La Usc di Ladins

L era en sabeda ai 29 de mèrz l ultim apuntament emportant de chesta sajon da marevea per Flora Tabanelli, l’atleta de 17 egn che fèsc l quarto an al Liceo artistich de Fascia te la sezion Design e la fèsc pèrt del projet Ski & Ice College de la Scola fascèna.
Na sajon che à confermà la capazità straordenères de la tousa che vegn da Sestola, tel comun de Fanano (MO) ma che la é enciasèda te Fascia e jà del 2023, de 15 egn, l’aea vent i Mondièi junior de freeski te la Nuova Zelanda, pruma atleta talièna de la storia a arjonjer chest resultat.
De jené del 2024 la joena atleta con si sauc e run da marevea la se à vadagnà doi medaes de or, tant tel slopestyle che tel big air, ai YOG, i Jeghes olimpics da d’invern di joegn de Gangwon te la Corea del Sud, olache la é stata ence portabandiera de la Tèlia e amò acà n an l’à endò concostà la venta ai Mondièi junior a Livigno e l’à scomenzà a se meter al luster anter la granes te la Copa del Mond, ruan 2 outes sul podie.
Te chesta sajon da marevea Flora é ruèda sul podie te duta la competizions de big air olache l’à tout pèrt e l’à concostà de bogn resultac e na venta ence tel slopestyle, ruan a se vadagnèr la Copa de crestèl no demò te sia pruma spezialità, ma ence te la classifica generèla de park&pipe. Apede chest l é stat ence la pruma talièna, e la più joena en assolut, a venjer i X Games a Aspen, ti Stac Unii. L ultim zil Flora la lo à arjont a la finèles di Mondièi de San Murezzan, te l’Engiadina svizera.

De più su La Usc nr 13 dai 4 de oril: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.

 (Lucia Gross)