La Usc di Ladins

No l é stat sorì ruèr a na soluzion, ma a la fin en sabeda ai 29 de mèrz, a la prejenza del notèr Andrea Rizzi, i sozi de la Sociazion Studies y enrescides Luigi Heilmann i à aproà co la maoranza califichèda di trei chèrc perveduda dal Statut de serèr su chesta sociazion, nasciuda acà 35 egn, e de ge devolver l patrimonie (zirca 150.000 euro) mez al Istitut Cultural Ladin ‘Majon di Fascegn’ e mez a l'Union di Ladins de Fascia, col vincol che chesta doi realtèdes che se cruzia de stravardament e valorisazion del lengaz ladin les doure chisc scioldi per portèr inant i projec che les à metù dant: l ICL per jir inant e meter a la leta de la comunanza l dizionarie del ladin Fascia VoLF, l'Union per portèr inant la enrescida e realisèr tratac su la botanica e sul lengaz di tesć storics ladins del '800 e '900, con l obligh per i doi benefiziaries de nominèr la Sociazion Heilmann sun duc i prodoc che vegnarà realisé de grazia a chest finanziament.

De più su la scontrèda e sul professor Luigi Heilmann é da poder lejer su La Usc nr 13 dai 4 de oril: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)