La Usc di Ladins

La é semper auta l’atenzion del conseier provinzièl ladin Luca Guglielmi per la circonvalazion Ciampedel-Cianacei. Na opera strategica per la val che podessa miorèr l problems del trafich che te sajon embocia la strèdes. 

Amò de dezember te na sentèda del Consei provinzièl Guglielmi à prejentà doi ordegn del dì che revèrda Fascia e che é stac aproé. Un de chisc rejona belapontin de la circonvalazion de la Val de Sora, na opera n muie emportanta ajache, descheche à spiegà Guglielmi te Consei provinzièl, la smendrassa l’embociament del trafich tel temp de sajon e la jissa a miorèr la calità de l’oferta del turism e la calità de vita di sentadins. L’orden del dì aproà dal Consei empegna la Jonta a ge dèr priorità a la projetazion de la circonvalazion Ciampedel-Cianacei desche opera strategica per Fascia, ence travers n confront con la aministrazions de Comun di doi paìjes. Per envièr via la projetazion preliminèra vegnarà durà ressorses jà a bilanz de la Provinzia o che la metarà ite te la proscima manovres. 

L’auter orden del dì prejentà da Guglielmi empegna enveze la Jonta provinzièla a verifichèr l met de comprèr la strutura de proprietà de l’ENEL sul tegnir del Comun de Cianacei per la destinèr a museo mineralogich/geologich tel chèder de n projet de valorisazion del patrimonie mineralogich de Fascia. Chesta strutura é sul jouf de Fedaa, te chest moment la é te condizions zompes e l’ENEL volessa la vener per 210.000 euro. La compra e la valorisazion de chesta strutura travers la restruturazion fajea jà pèrt de la cordanza de program “Fascia tel davegnir” sotescrita con la Jonta provinzièla da l’ex Procuradora del Comun general Cristina Donei. 

Te chesta cèsa podessa troèr lèrga la colezion de minerèi che Dino Rosa da Cianacei, clasc 1918, ge à donà al Comun de Cianacei, na colezion che fin ades no à amò troà na lèrga adatèda. La Provinzia se empegna ence a valutèr i cosćde gestion de na strutura museèla su la finanza publica.  (mci)