La Usc di Ladins

Al é sté bindebó de sciosciüre, canche al é gnü fora che le raiun turistich da Porsenú â metü en pe na cooperaziun de marketing nöia cun deplü raiuns incëria, sot l’inom "Brixen Dolomites", olache an s’anüza dla gran popolarité y atrativité dl inom dles Dolomites, por n raiun che ne les á pordërt nia. La reaziun ladina é gnüda atira, cun na cherta firmada dai ombolc y dai operadus turistics de Gherdëna, che á protesté cuntra chësc "stöp dolomitich" ti edli. Sostëgn ái spo ciafé da pert dl’Alta Badia. Incö jöbia ai 13 de forá á la Cooperativa Turistica Alta Badia mené fora na cherta firmada dai ombolc de Corvara, Badia y La Val – resp. Robert Rottonara, Iaco Frenademetz y Felix Nagler, y dai rapresentanc dla CT Alta Badia – le presidënt Christian Pescollderungg y i dui vize Daniel Frenes y Diego Mussner.

"Segnal ingianus ai ghesć"
Ombolc y operadus turistics i dá rajun ai colegs de Gherdëina y spliga che l’adoranza nia controlada dl inom Dolomites rapresentëia n svilup problematich "che pó ala lungia mëte al prigo l’imaja de nosta regiun y la credibilité de nosta oferta turistica." Inant vëgnel splighe che "Le dër posizionamënt é fondamental por mantigní la trasparënza y la credibilité dles destinaziuns che nen fej pert. La fondaziun dla cooperaziun de marketing "Brixen Dolomites" mëna fora da nosc punt d’odüda n segnal ingianus ai ghesć." 

Regoles tleres
Ombolc y turistics dl’Alta Badia se damana che al vëgnes metü regoles tleres ince tla comunicaziun y vëiga che i ghesć vëgn gonot ingianá: "Sciöche nüsc colegs de Gherdëina á bele splighé, vál atira debojëgn da apliché regolamentaziuns tleres y conzec de mobilité sostenibla. Tl medem tëmp ghirunse ince regoles tleres tla comunicaziun. Tres indô odunse che hotí y destinaziuns de Südtirol anüza te süa comunicaziun l’inom "Dolomiten" o "Dolomites" o che ai adora retrac de nostes contrades uniches, scebëgn che ai ne toca geologicamënter nia pro les Dolomites. Chësta pratica porta a n retlam ingianus y a na suraciaria de nostes valades, deache i vijitadus mina da rové diretamënter tles Dolomites y é spo sforzá da fá iadi plü lunc por rové cina ales dërtes atraziuns."

Cuntra les "defilades de auti" söi jus
Nia inultima vëgnel critiché tla lëtra chi hotí che organisëia "defilades de auti" sön i jus dolomitics o nen imprësta ca por jí a se fá na jita de n te: "De te manifestaziuns sostëgn na forma de trafich individual, che vá cuntra nüsc sforc da smendrí le trafich y da sconé i raiuns naturai sensibli." La lëtra vëgn stlüta jö cun la orenté da se dé inant da fá por n svilup sostenibl, autentich y responsabl dl turism, invian les destinaziuns partner da tó söl scerio la tematica y mostré respet danter les destinaziuns partner: "Ma tres na cooperaziun strënta y na comprenjiun reziproca por n svilup sostenibl podunse assiguré che le turism sides ala lungia n davagn por düc."  (pablo)