La Usc di Ladins

N lomiscel de fi, n per de spëisc, n’aodla, fantasia, paziënza y na bona man: chësc é ci che mëda Maria Declara de Badia, adora por fá n per de scofuns. Ch’ara â na bona man, s’â bele sües maestres intenü, canche la picia Maria â fat de bi capolaurs cun fi te scora. Laota imparâ ciamó les mitans da fá cialza y da cují fora da sües maestres, tratan l’ora de "lavoro". Ti ultims agn la vëigon dër gonot ch’ara fej cialza: ciüries, sciarpes, cialzines, manëces. Mo süa gran pasciun é bëgn i scofuns por i viadus. Chilometri y chilometri de fi ára trasformé te scofuns y an pó oramai dí ch’ai é conesciüs lunc y lerch. Deach’ara á dagnora albü n bun cör, s’ára ponsé n de da ti fá na ligrëza ai geniturs di mituns che nasc massa adora. Dilan a na infermiera che laora bele da deplü agn incá tl repart de pediatria dl ospedal de Balsan, ti ortiëiera ite regolarmënter de te pici scofuns de vigni corú y cun de vigni sort de mostres.

Deplü sön mëda Maria y süa pasciun podëise lí t’La Usc di 14 de forá