La Usc di Ladins

»Aon fiduzia ti dac che ne moscia n smendrament del dan da becherle ma ge vel aer pazienza e lascèr che l bosch se tire su«. L é na fotografia del bosch mingol più positiva chela che vegn portà dant chisc dis ti apuntamenc anuèi ti desvalives Comuns de Fascia con la sescion forestales.

A la scontrèda de en jebia ai 6 de firé te Comun de Moena l diretor del Ofize Forestal de Ciavaleis Damiano Fedel e l funzionarie Francesco Dallabrida à prejentà l andament de l’epidemia da becherle che enscin ades, dal 2019, te Fiem l’à fat n dan de 803.000 m3 e te Fascia de 233.000 m3 su na superfize complessiva de presciapech 4.000 ha. La ponta maora te noscia val é stata del 2023 con 180.000 m3, te Fiem del 2022 con 400.000 m3, l an passà enveze i doi teritorie se à presciapech valivà.

E chest an? Co sarèla la situazion? »Dut stèsc a coche sarà l temp, del 2024 con na aisciuda da pievia e n uton freit, no l é stat la condizions giustes per l becherle, per chest l é zessà. Ma no sion amò fora, se jirà inant ence del 2025 con l monitoraje« i à spiegà.

Podede lejer dut su La Usc stampèda de en vender ai 14 de firé.

 (Monica Cigolla)