Presentaziun ofiziala dl sostëgn dles istituziuns al reconescimënt dles liëndes ladines sciöche patrimone cultural Unesco: Incuntada formala dl’Uniun Ladins Val Badia cun rapresentanc dla politica y cultura
En mercui, ai 10 d’agost 2022, á l’Uniun Ladins Val Badia invié a San Martin de Tor a na incuntada cun i assessurs provinzial resp. regional Daniel Alfreider y Manfred Vallazza tl salf dl Istitut Ladin Micurá de Rü por presenté formalmënter na domanda de sostëgn da pert dles istituziuns al reconescimënt dles liëndes ladines sciöche patrimone cultural Unesco. Trami i rapresentanc politics á tut sö la proposta cun gran entusiasm y á impormetü da sostigní deplëgn chësta idea y iniziativa. Le proscimo vare sará chël da dezifré les formalités che vá debojëgn por pié ia cun l’iter dl reconescimënt dan ai esperc dl’Unesco.
René Pescoll, presidënt dl’Uniun Ladins Val Badia, á alzé fora te so discurs
che la proposta dl’ULVB dess ester n vare formal por ti recordé ales autorités na ghiranza che é bele sön mësa da n valgügn agn (ciara ince l’iniziativa dl grup de laur "Comité dl lingaz ladin" cun Susy Rottonara, Roland Verra, Paul Videsott y Marina Rubatscher Crazzolara dl 2017): "Nia por ti lascé odëi al monn tan che i sun bugn y braui, mo por avëi nos instësc l’ocajiun da se dé jö, a funz y inant tl tëmp, cun nostes raisc culturales y nosta identité, y cun l’orenté da ti surandé, ales generaziuns che á da gní, chësc bel patrimone, unich y de valüta straordinara", á dit Pescoll.
Canche les formalités nezesciares sará stlarides, gnaral metü sö n comité de promoziun che se cruziará di contac y dles colaboraziuns cun dötes les uniuns y istituziuns che á l’orenté da fá para al’iniziativa.
Liéde inant deplü tla ediziun atuala de La Usc di Ladins!Söl retrat: Monica y Elena á porté dant deplü toc de musiga tla atmosfera dles liëndes ladines.
