La Usc di Ladins

L é passà 15 egn da canche, endèna la festes de Nadèl, duta Fascia e soraldut l mond del socors restèa destrametui da la mort de cater socoridores de la Stazion de la Val de Sora, sepolii da na levina ai 26 de dezember del 2009 endèna che i jia a ge portèr socors a etres schiadores che te la Val Lasties era resté sot la neif.

Alessandro Dantone, Diego Perathoner, Erwin Riz e Luca Prinoth: cater joegn fascegn gaerc, capazi e empegné per didèr i etres, morc de colp, duc ensema, endèna n intervent de aiut sa mont.
La tragedia de la Val Lasties l é restà per l mond del socors na crepa fona, vèlch é mudà. I socoridores i sà che te si intervenc i pel meter a risech sia medema vita, ma chel l é stat n fat massa pesoch, che à metù duc dedant a na realtà tant grieva da stentèr a azetèr.

Amò ades, chi che era più vejins ai cater socoridores resté sot la levina i stenta a rejonèr en publich o coi media de chel tragich fat che à segnà la storia del socors. Ma segur no i à mai desmentià e no i desmentiarà mai Alex, Diego, Erwin e Luca: duta la comunanza no i desmentia.
Te chest cedean l é stat endrezà desvaliva scomenzadives per i recordèr, anter chestes l ‘segnadis’ metù ensema per endrez de Germano Rasom, Lydia Rauch, Alessandra Baldi e Stefen Dell’Antonio Monech, col sostegn de dut l Socors.
Col retrat che l é sun chest calandèr, recordon Alex, Diego, Erwin e Luca te chest cedean e semper, con amor e recognoscenza ge vardon su e ge domanon che i vèrde semper via duc nesc socoridores.

De più su La Usc stampèda de en mèrtesc ai 24 de dezember.  (Lucia Gross)