La Usc di Ladins

Passa 100 é i proiec de solidarieté che vëgn sostegnis vigni ann tres l’aziun di Trëi Rêsc, batiada sciöche le »Aiüt sot a na buna stëra«. Tla diozeja de Balsan/Porsenú vëgnera coordinada dala Schira Jonila de Südtirol y a livel de ploania da n gröm de volontares y volontars che se mët a desposiziun, deache al ó ester tröpes mans por che döt vais dl dër vers. Sce ara gareta, él dantadöt ince mirit di feter 5.000 rêsc cun sü acompagnadus, che se mët sön tru fora por les ciases a porté la Buna Noela de Nadé – mitans y mituns che dá ca so tëmp por n bun fin. I früc se lascia spo ince odëi, deache ann por ann vëgnel ite na bela spënora – dl 2024 él avisa sté 1.609.455,77€.
Sciöche vigni ann, vëgnel presenté n proiet en particolar. L’aziun 2025 nes porta tl’Indonesia, plü avisa te n istitut a Lewoleba sön l’isola Lembata. Iló ti vëgnel dé alberch a mituns orfans; gonot se tratera de mituns olache i geniturs n’â nia scioldi assá da i mantigní, te d’atri caji él mëndri che á vit violënza te familia. L’istitut atual é gnü fat sö cun bambus y material scëmpl, tan che al é sëgn valgamia en malester y dala sajun dles plöies tirel ite ega. Cun i scioldi dl’aziun di Trëi Rêsc dessel gní fat sö n secundo istitut, ince deache la lerch ne tleca nia por curí la domanda. L’istitut nü ará porchël döes frabiches: la pröma cun les ciamenes da dormí por mitans y mituns, dusces y cagadus; la secunda cun la ciasadafüch, n salf da mangé y le magazin. Preodü él ince da arjigné n urt por coltivé verzöra y por ativités de tëmp lëde. Cun i laurs passarán da 35 a 70 posć.

 (pablo)