La Usc di Ladins

Trëi cherc di litadus dla Polonia ti á dé la crëta ales trëi coaliziuns de lista al’oposiziun: le 30,7% ala "Plataforma" de Tusk, le 14,4% ala "Terza strada" y le 8,6% ala "Man ciampa nöia"; deboriada á les trëi listes le 54% dles usc: 248 scagns sön 460.
Le partí plü sterch resta indere le PiS cun le 35,4% dles usc y 194 sëntes tl Parlamënt. Ciamó n partí de man dërta é presënt tl Parlamënt: la Konfederacja, cun le 7,2%.
Sëgn ti tocarâra al presidënt dla Polonia Andrzej Duda da surandé a zacal la formaziun dl govern. Al pé che Jaroslaw Kaczynski ne se ciafes nia partis assá por formé la coaliziun, la Konfederacja ne basta nia por na maioranza.
Donald Tusk é n politich de format europeich y democratich. Al é sté cina l’ann passé surastant (dal 2019 incá) dl PPE (partí popolar europeich), por mez ann (2011) presidënt dl Consëi dla Uniun Europeica y dal 2014 al 2019 presidënt dl Consëi Europeich. Al é bele sté n iade premier dla Polonia, dal 2007 al 2014.
L’Europa á trat n süst de ligrëza, aldin la notizia che la Polonia á lité cuntra le sistem autoritar orü dal PiS. Y chësc bëgn cun na partezipaziun de lita da récord tla storia dla Polonia: le 73%.  (Iaco Rigo)