La Usc di Ladins

‘Tel acort, é pissà’ l é l titol che ge é stat dat al apuntament endrezà a Moena en mercol ai 7 de aost tel chèder del Festival Fascia Panorama Music e di apuntamenc de la rassegna Moena Incontri.

Tel acort, belapontin, l publich che à empienì la sala Rovisi à scutà e pissà, à tout su e fat sies la poejies che la poeta Roberta Dapunt à portà dant se enterzan con la notes de la vidola del musizist Marcello Fera.

Roberta Dapunt la é da Ciaminades, te la Val Badia, l é una de la autores più aprijièdes de la poejia ladina contemporana. Sia operes, scrites per ladin e talian, é states regoetes e publichèdes da Einaudi, l’ultima sia produzion de chest an 2024 l’à per titol ‘Il verbo di fronte’. Da chiò e da l’autra sia publicazions Dapunt l’à cernù fora e let ju vèlch una de sia poejies più segnificatives, scric personèi e interiores che l’à metù en dialogh con la composizions musicales del violinist Marcello Fera.

N dialogh chiet, anter la poejia e la musega, anter i autores e l publich che é restà al lonch ciapà via, sora pensier, en tenjion, encantà da la paroles, la letura personalisèda, la ousc fona e la notes pienes. 

De più su La Usc stampèda de en vender ai 16 de aost.  (Monica Cigolla)