La Usc di Ladins

L’é n fil strent chel che lea la eles a l’èrt. Ence te chest ciamp la femenes à fat fadia a se taèr fora l dret recognosciment, ampò canche la sensiboltà, conscidrèda na carateristica soraldut feminina, se conjobia con la forza del pensier e la capazità de enrescida tecnica che segur no ge mencia a la eles, troan esprescion te la formes de l’èrt, i resultac pel esser dassen de gran valuta.

De chest se n’à adat la sociazion »La Voce delle Donne«, che jà da vèlch an l’à fat nascer l projet »ArtÈdonna« per ge dèr a la femenes de noscia valèdes l met e l’ocajion de se sproèr con l’èrt e de meter fora sia operes e se fèr cognoscer. Dò aer endrezà ti egn passé esposizions te desvaliva sales de Fiem e Fascia, chest an »ArtÈdonna« à fat dassen n saut de calità, ruan a meter fora te na senta prestigiousa desche l Museo de èrt contemporana de Ciavaleis la operes de passa 30 autores: vèlch una é artista de profescion e autres depenc o se dèsc jù con l’èrt demò per delet, ampò n muie les à arjont dassen n aut livel artistich.

La mostra, averta ai 16 de mé fora Ciavaleis, à abù dassen n gran bon ejit e te la vijites vidèdes de la sabeda domesdì l’é stat l met de entener e aprijièr amò de più sia valuta. En sabeda passèda l diretor del Museo de èrt Elio Vanzo à prejentà con gaissa la operes e la autores. Vèlch una era te sala, e l’à podù dir vèlch en pruma persona, desche Valeria Battel e Mariapia Desilvestro, ma per ogne chèder i vijitadores à podù aer na chief de letura dassen enteressanta e ence entener l segnificat complessif de chesta 5^ edizion de la esposizions »Art Box Avisio«, che l Museo de Ciavaleis à volù ge dedichèr dut a la eles, con doi desvaliva esposizions, en colaborazion con »La Voce delle Donne«, tel prum partiment chela de »ArtÈdonna« e sun aut chela leèda a na publicazion particolèra. 

L secondo partiment del Museo d’èrt contemporana de Ciavaleis l’é enveze dut dedicà a na esposizion leèda a n projet envià via acà 3 egn da la artista e ensegnanta de la Scola de Fascia Lara Steffe da Moena ensema con n’autra femena, enrescidora e artista, Laura Scalvenzi, che se à concretisà tel liber »Rivelazionni di donne di arte« olache 20 eles, da 13 Paìjes desvalives, conta sia storia e l’emportanza de l’èrt te sia vita, uzan fora n leam strent e beleche magich che va sorafora età, lesc, cultures e religion.

La esposizions é da poder veder tel Museo de èrt contemporana de Ciavaleis enscin ai 20 de jugn, de vender, sabeda e domenia da les 15.30 a les 19.00. L liber é da poder troèr te la mostra o sun internet.

De più du La Usc stampèda de vender ai 18 de jugn.  (Lucia Gross)