La Val á inaudé le labirint de meditaziun

Data

27 de jugn 2022

Galaria retrac

Grandeza scritura

Social

En domënia dl Cör de Gejú él gnü inaudé a Dlijia Vedla da La Val n labirint de meditaziun, realisé tres le Grup de meditaziun dl paisc: n post por perié, lascé palsé l’anima y daidé rové zoruch pro se instësc

Oraziun y meditaziun á per se le fin da acompagné la porsona pro se instëssa, da la porté zoruch al’essënza de süa esistënza, da la condüje plü daimpró a Chël Bel Dî. Formes y manires él n gröm: öna de chëstes é i labirinc de meditaziun. Bele de forá ânse presenté t’La Usc la orenté da realisé n te labirint danter les fondamëntes de Dlijia Vedla a La Val. Le proiet é gnü porté inant dal Grup de Meditaziun da La Val y en domënia dl Cör de Gejú ésera stada tan inant che an á podü le benedí. Ala inaudaziun á tut pert ince l’Ombolt da La Val Angel Miribung, le proietant y espert de labirinc Gernot Candolini da Desproch y siur Degan Iaco Willeit, che á cherdé jö la benedisciun de Dî. N de de gran sodesfaziun ince por la promoturia Alma Moling Schuen, che á metü dant na parora sora: "Giulan!"

T’La Usc di Ladins dl 1. de messé podëise lí deplü. Chiló ves pitunse n iade valgünes impresciuns fotografiches. (pablo)