La Usc di Ladins

Vivanda tl’ena da Carnescià a S. Cristina!
Ntan l’ena da Carnescià vëniel metù a jì de bela manifestazions dala Lia per l Turism de S. Cristina
N Juebia Grassa, ai 8 de fauré, ie duc nviei a unì mascherei sun Plaza de Chemun: dala 09:45 inant saràl l’afa Bobby che purterà dant si bai y matades, fajan devertì i mutons y la mutans. Da mesa la 11 inant saràl da giapé na bona panicia y crafons.
N lunesc ai 12 de fauré puderàn se lascé depënjer l mus dala 14:00 nchin la 16:00 tla biblioteca Tresl Gruber. Per finé via uniràl ai 13 de fauré, n Merdi de Carnescià, metù a jì tl zënter de S. Cristina na gran Skishow da Carnescià de duta la Scoles de Schi de Gherdëina, ulache l sarà da udëi na bela desmustrazion de mascres sun i schi y sauc - sambën ne manceràl nia mujiga da druch. Duc y dutes ie nviei de cuer.

Festes da Carnescé tl’Alta Badia
En ocajiun dles edemes de Carnescé vëgnel organisé tl’Alta Badia deplö festes y defilades
Ai 8 de forá vëgnel metü a jí a Calfosch dlungia le punt tl zënter dl paisc dales 13:30 inant na festa en pista cun müjiga y animaziun de clowns por pici y gragn. N valgügn bars y eserzizi dl post dará fora da bëir y canifli da Carnescé. Le medemo de ince a La Ila sarál animaziun da Carnescé tl parch dan la scora de schi da La Ila dales 14:30 inant y an á ince la poscibilité da pastelné n ciapel adöm a Anna y se lascé depënje le müs. Chiló sarál le grup di jogn che se crüzia da dé fora val’da bëir y val’ de duc. La domënia de Carnescé vëgnel tigní a Badia la tradizionala Carnival Cup: la gara en maschera jödapé dla pista La Crusc1 mët man dales 14:00 y düc é inviá a tó pert cun val’ meso de trasport particolar. Le mertesc ai 13 de forá él en program na festa cun defilada dles mascheres jödapé dla pista Col Alt a Corvara dales 14:30. Na iuria premiará la maschera plö bela y originala. En chësta ocajiun vëgnel metü a jí ince l’acrobatic show adüm al Freestyle Team Pirates Alta Badia y n valgügn bars y eserzizi dl post dará fora da bëir. Le mertesc sëra é l’apuntamënt cun la »Nöt dla liösa« a San Ciascian dediché al Carnescé: düc é inviá a tó pert ala manifestaziun vistis en maschera y chisc ciafará na picera scincunda. Tres la pista Foram ilominada dales 19:30 ales 22:30 pon ince tó pert ala ciacia ala »olp Movimënt«. Düc che che la abina y sciafia da fá na foto para ciafa na picera scincunda.

Pest de poejies ladines »Angelo Trebo«: escrizion dla diejima edizion
Termen per mené ite les poejies: 15 de merz 2024
Al é n concurs de poejies davert a duc chi che scriv per ladin, metú su dl 1997 a San Martin de Tor. Con l’edizion dl 2012 é l pest trienal vegnù daurì a dutes les variantes ladines y i idioms ladins dl raion dles Dolomites, cie che à porté spo tles ultimes cater edizions a na maioura partezipazion da pert de autoures y autours. L’edizion nueva, segn daverta, é chela dl 2024. La premiazion é preveduda per mei 2024.
Criters y condizions
Da prejenté él – ence en chest iade – anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tò pert él da paié ite sun l cont bancar IBAN IT41H 08010 58830 000 304000455 intesté a l’EPL-Ert por i Ladins la comiscion de partezipazion de 20,00 euro.
Vigni autour:a prejenteia les poejies te cinch copies, les contrassegneia con n pseu­donim y ajonta laprò te na mendra cuverta scluta si dac anagrafics y l’atestazion dl versament dla comiscion de partezipazion. Sun la mendra cuverta scrivel:ela si pseudonim.
La miscion per mené ite o dé ju a man l material per tò pert al concurs – anter l 15 de merz 2024 – é:
EPL-Ert por i Ladins, Pest »Angelo Trebo«, str. Stufles 20, 39030 San Martin de Tor/San Martino in Badia, BZ.