La Usc di Ladins

Pest de poejies ladines »Angelo Trebo«: escrizion dla diejima edizion
Termen per mené ite les poejies: 15 de merz 2024
Al é n concurs de poejies davert a duc chi che scriv per ladin, metú su dl 1997 a San Martin de Tor. Con l’edizion dl 2012 é l pest trienal vegnù daurì a dutes les variantes ladines y i idioms ladins dl raion dles Dolomites, cie che à porté spo tles ultimes cater edizions a na maioura partezipazion da pert de autoures y autours. L’edizion nueva, segn daverta, é chela dl 2024. La premiazion é preveduda per mei 2024.
Criters y condizions
Da prejenté él – ence en chest iade – anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tò pert él da paié ite sun l cont bancar IBAN IT41H 08010 58830 000 304000455 intesté a l’EPL-Ert por i Ladins la comiscion de partezipazion de 20,00 euro.
Vigni autour:a prejenteia les poejies te cinch copies, les contrassegneia con n pseu­donim y ajonta laprò te na mendra cuverta scluta si dac anagrafics y l’atestazion dl versament dla comiscion de partezipazion. Sun la mendra cuverta scrivel:ela si pseudonim.
La miscion per mené ite o dé ju a man l material per tò pert al concurs – anter l 15 de merz 2024 – é:
EPL-Ert por i Ladins, Pest »Angelo Trebo«, str. Stufles 20, 39030 San Martin de Tor/San Martino in Badia, BZ.

Ativités sportives tratan l’isté
»Sportweek all day 2024«: edemes de sport por mitans y mituns dla scora mesana, che vëgn tignides anter Badia y Corvara
Le Skiteam Alta Badia mët a jí d’isté »Sportweek all day 2024«, cun ativités sportives por mitans y mituns dla mesana (nasciüs dai agn 2010 a 2012). La pröma edema é dai 15 ai 20 de messé, la secunda dai 29 de messé ai 3 d’agost, tres dal lönesc ala sabeda dales 9:00 ales 16:00 (marëna nia lapró). Al gnará fat chisc sporc: arpizé, roda, beach volley, trampolins, parch aventöra, jüc de scuadra, acrobatica y parcour, nodé y jüc t’ega. Les iscriziuns vëgn tutes sö dai 4 ai 10 de merz sot al link https://forms.gle/jgbaRA3NjTWXTLtf6
Al vëgn tut sö da min. 8 cina max. 16 partezi­panc al’edema.
Les ativités vëgn tignides ti comuns de Badia y Corvara, cun i alenadus Gabriel Crazzolara, Piero Di Luca, Davide Moling y Heinrich Conrater. Le cost é de 130,00€ al’edema (+20,00€ d’iscriziun al ST Alta Badia). Infos: skiteamaltabadia.it

»Sound of Südtirol« dla grupa Choriosum
La Ggrupa Choriosum nvieia a si cunzert n dumënia ai 10 de merz dala 18:00 tla Cësa di Cungresc a Urtijëi
L cor de Bulsan à purtà dant na lingia de cunzerc ntan l ann 2023; chësta àn ulù purté inant nce chëst ann a Urtijëi, ulache l cor ova ciantà nce bele tl 2018 cun gran suzes »Giorgio by Choriosum«, n unëur de Giorgio Moroder.
Cun »Sound of Südtirol« se à l cor a-cappella Choriosum dat ju cun la mujiga de Süd­tirol. Sot ala direzion de Hannes Knollseisen vëniel ciantà cianties y meludies de cum­ponisć y ciantau­tëures de Südtirol – dut zënza cum­paniamënt stru­mentel.
L unirà ciantà per ladin, tudësch, talian y nglëisc. La chertes – che costa 20,00 € – pòssen cumpré tl ufize dla Lia de Turism a Urtijëi o online sot a www.choriosum.it.

Culëures viandanc – Mili Schmalzl
L Circolo–Lia Mostra d’Ert nvieia ala giaurida dla mostra dal titul »Culëures viandanc« de Mili Schmalzl, n vënderdi ai 8 de merz dala 18:00 tla sala dla Lia Mostra d’Ert a Urtijëi
Pië via per abiné la lidëza. Se muever demez da si ncësa per mparé a cunëscer d’autra pertes de sé nstësc. Cie fossa pa l’ert sce l ne fossa nia n mudamënt costant? L viac ie n simbul de svilup per ne resté mei fërmesc. Chësta descrizion pudëssa vester na carateristica per l’atività artistica de Mili Schmalzl. Ëila à te si truep stii for desmustrà de vester davierta a purvé ora tecniches nueves, zënza tëma de pierder cie che la à mparà y zënza ulëi tenì na forma coche assoluta. Si ert ie n svilup costant; danter schizes, lëures finei y lëures po­vester mo nia finei, liejen ora na man fina che ie tacheda al esperimënt de culëures y formes che se muev.
La mostra resterà davierta nchin ai 31 de merz, dala juebia nchin la dumënia dala 16:00–19:00, de sada y dumënia nce danmesdì dala 10:00–12:00.

Ensemble Baborák
I Jëuni de Mujiga à l plajëi de nvië al cunzert dl Ensemble Baborák, n lunesc ai 4 de merz dala 20:00 tla Cësa di Cungresc a Urtijëi
L ensemble Baborák ie unì metù su tl 2003 da Radek Baborak, sunadëur de corn y dirighënt cunesciù a livel nternaziunel y sunadëur de corn solist da ntlëuta dla Berliner Philhar­moniker. L repertoire dl Ensemble Baborák tol ite opres de mujiga tlassica de de plu epoches, dal baroch nchin a chëla d’al didancuei. A lië i cumëmbri iel dantaldut la gran legrëza de fé mujiga, ma nce l ardimënt per la abineda de pec nia cunesciui y la crissa de lëures speziei, nia tradiziunei.
L ensemble – metù adum da Milan Al Ashab, Martina Bacová (vidula), Radek Baborák (corn), Karel Untermüller (viola), Hana Baborá­ková (celo), David Pavelka (violon)- vën prijà dantaldut per si nterpre­tazions di lëures de Mozart y per si tecnica straurdinera.
Sun l program dla sëira iel opres de Rejcha, Glazunov, Beethoven y Kogan.

Di dl’ëiles tl Museum Gherdëina
N ucajion dl di nternaziunel dl’ëiles ai 8 de merz nvieia l Museum Gherdëina a na matinée, dala 10:30 inant. L argumënt ie destins de ëiles de Gherdëina dl 18. y 19. secul
Testemunianzes abinedes ca ora di archifs, purtedes dant da Marta Valersi und Josef Nössing tla rujeneda tudëscia. La Matinée dëssa tré pea te n viac sentì tla storia dl’ëiles de Gherdëina. L ie stories de zandleres y zandlëtes, de zipladësses, marcadëntes y buteghieres, de chëles che purtova ora l pan y che jiva cun si marcanzia da porta a porta (carabotes),... L vën a lum destins y situazions datrai nce tragiches.
Cuntà vëniel nce ulache les jiva a sté do maridé y truepa d’autra ntraunides, dajan na vijion dla posizion soziela y giuridica dl’ëila de chël tëmp. La ntreda ie debant.

Schi Club Gherdëina: doi garejedes
N chësc fin dl’ena mët l Schi Club Gherdëina a jì doi garejedes: una de pudejé y una soziela, in memoriam de Simona Senoner
N duman, sada ai 2 de merz vëniel metù a jì nce na garejeda soziela sun Pana/Cende­vaves: l 12ejim Memorial Simona Senoner, na garejeda de saut y cumbinazion nordica, che scumëncia dala 10:00. La premiazion sarà nteur la 13:30 pra i Sauc.
N dumënia ai 3 de merz dala 10:00 saràl pona mo la »Copa de pudejé« sun Pana.

Pastelné por Pasca
Cursc con Pia Pedevilla, tl atelier a Bornech
La designer che abitëia a Bornech, tëgn te so atelier (Gross Gerau Promenade 6c) dui cursc da pastelné por Pasca, por mituns dai 6–7 agn insö (acompagná), por insegnanc y adulc interessá.
Al gnará fat conici, iarines y punjins taiá fora de lëgn y decorá cun materiai naturai, vëtes, perles y formes de ghips. Al vëgn ince depënt üs. I cursc é en domënia ai 10 de merz o en sabeda ai 23 de merz, dagnora dales 14:00 ales 18:00.
Le prisc é de 60,00€ a ce plü 20,00€ de material (i acompagnadus ne paia nia, mo pó ince lauré impara). Le curs vëgn metü a jí en colaboraziun cun l’EPL–Ert por i Ladins.
Al vëgn tut sö ma 6 partezipanc a curs. Info y iscriziuns pro Pia Pedevilla al 348 2221745 o info@piapedevilla.com