La Usc di Ladins

Festa dla leteratöra
Premiaziun dla X ediziun dl pest trienal de poesia ladina Angelo Trebo y presentaziun dl liber dla racoiüda iubilara
En sabeda ai 10 d’agost 2024 dales 11:00 gnarál tigní al Badia Pub a Pedraces la festa por la pre­miaziun dl Pest de poesies Angelo Trebo. En chësta ota él gnü metü da jí la X ediziun dl pest lirich, daverta a dötes les variantes ladines. Le con­curs de poesies vëgn metü da jí vigni trëi agn, dal 1997 incá.
En chësc de se presentará la juria de valutaziun, les premiades y le premiá liará dant sües poesies, al gnará presenté da pert dl’EPL le liber nü che tol ite dötes les poesies premiades dal 1997 incá tles diesc ediziuns y le grup de Gherdëna Chëifree sonará musiga jazz por la dërta aurela cörta.

»Dieci ferite« de Lorenzo Fabiano
Prejentazion dl liber ai 19 de agost te Tublà da Nives
L jurnalist y scritëur de Verona, Lorenzo Fabiano prejënta si ultima fadìa leterera che rejona de diesc ntraunides sportives che à caraterisà si nfanzia, les metan n relazion, da una pert cun si prozes de chersciuda tl raport cun i mic dl sport y dal’autra cun la situazion soziela y politica particulera dla Talia di ani ’70, danter crisa economica y ani de plom y terorism. Lorenzo Fabiano à scrit per »l’Arena di Verona« y l »Corriere del Veneto«, ie sën jurnalist liede (free-lance) y à n liam strënt cun Sëlva y Gherdëina, ulache l vën n feries da canche l fova pitl y che ël nstës descrij sciche si segondo ncësa.
La prejentazion dl liber sarà n lunesc, ai 19 de agost 2024 cun scumenciamënt dala 20:30 da sëira te Tublà da Nives te Sëlva.

Prejentazion dla grupes de sucors zevil de Gherdëina
N lunesc ai 19 de agost dala 19:00 inant se prejenterà la grupes de sucors zevil de Gherdëina tl Zënter Iman a S. Cristina
L fin de chësta ma­nifestazion ie de mu­stré l lëur de chësta grupes, coche nce de valorisé la mpur­tanza dl sucors zevil te valeda.
Da mesa la nuef da sëira inant fajerà duta la grupes de­berieda na desmu­strazion dal vif scial­di nteressanta.

Cunzert dl’Urchestra Sonoton
L’Urchestra Sonoton Gherdëina, sot ala direzion de Alex Designori, nvieia de cuer al cunzert da d’instà n sada ai 10 de agost dala 20:30 y n dumënia ai 11 de agost 2024 dala 18:00h sun Plaza de Chemun de Sëlva
Ntan l cunzert saràl da audì pec de mujiga da film de John Williams, Hans Zimmer y truepa d’autra cumposizions cunesciu­des, coche nce n pez dl cumponist Tobias Psaier. Chertes de ntreda ie da giapé pra la cassa da sëira, n sada dala 19:30 y n dumënia dala 17:00 inant. N possa nce apusté danora la chertes tres la plata Facebook o Instagram dl’Urchestra Sono­ton o tres l codesc QR da abiné sun i placac. I musicisć y la mu­sizistes se ncunforta!

Conzert disco cun la Müjiga da La Ila
N conzert nü y modern ponsé por fá balé l’ascutadú sciöche te n local da festa
Musiga da balé, melodies conesciüdes che vignun cianta para, löms che roda, n bun drink tla man, … sunse mo te discoteca?
En vëndres ai 23 de agost él la Müjiga da La Ila che inviëia düc a n conzert particolar ala­leria, tl zënter de paisc. Al vëgn porté dant toc plëgns de ritm soná dala musiga y ciantá dala ciantarina Lucia Kastlunger, che portará l’ascutadú te n’atmosfera da discoteca.
L’intratenimënt musical gnará tres indô baraté jö tratan la sëra danter la Müjiga adöm ala ciantarina y DJ Elf. Tratan la sëra gnarál dé fora da bëre dal grup di Jogn La Ila.
La Müjiga da La Ila, Lucia Kastlunger, DJ Elf y i Jogn La Ila en colaboraziun cun la Cooperativa Turistica Alta Badia ves aspeta dales 21:00 tl parch sot ala Scora de schi La Ila por le conzert »A night at the disco«.
Tl caje de bur’ tëmp vëgn le conzert sposté ala sabeda 24 de agost.

Festa a Calfosch
Chësta domënia ai 11 d’agost organisëia i Stüdafüch da Calfosch na festa alaleria
La festa mët man dales 11 dan­misdé cun le »Marco Wahrstatter Duo«. Dales 12:00 inant cina ales 20:00 vëgnel pité de vigni sort de speziaries ala grilia. Danterite, dales 15:00, sarál na defilada fora por paisc cun travert tl pinëi (pineta) y dales 16:00 él la Müjiga Corvara–Calfosch che tëgn conzert. Dales 18:00 cina ales 22:00 él spo i »Brennholz« che fistidiëia dl intratignimënt musical. Ponsé án sambëgn ince ai mëndri: dales 15:30 cina ales 19:30 vëgnel pité jüc de vigni sort, animaziun, la poscibilité da se lascé depënje sö le müs, bambesc de zücher y popcorn.

Festa de Santa Maria dal Ciüf a La Ila
Le paisc da La Ila se arjigna da organisé la festa de Santa Maria dal Ciüf, cun na defilada sot al titul »La ciasa dl cör«
En jöbia ai 15 de agost vëgnel tigní la tra­dizionala festa de »Ferragosto«, che mët man dales 11:30 tl zënter da La Ila. La marëna, cun spezialités ala grilia, polënta y tutres, gnará acompagnada dales melodies dla Müjiga da La Ila. Dales 13:00 inant él la Uniun Bal Popolar cun i pici Platleri dla Val Badia che presentará i bai tradizionai. La defilada tra­dizionala, dedicada chësc ann al tema »La ciasa dl cör«, mët man dales 14:30 y al gnará rapresenté i artejans che arjigna ca la ciasa dl cör sön i ciars dles uniuns dl paisc: le tistler arjigna ca le let, le feur les morones, le roder les rodes por i gratuns da mené le patüc dla novicia, le monter la copa da se lavé, le sotler fej le strasoch, le scoaciamin controlëia la cialdira y ala fin le fotograf che fej la fotografia da noza da taché sö te stüa. La defilada vëgn acompagnada dales Musighes da La Ila, La Val y Tiers. Do la defilada pó düc ciamó se gode les melodies dla Musiga da Tiers y da sëra sonará le grup »The Jam’son«. La festa vëgn organisada dai Stüdafüch y dala Müjiga da La Ila, en colaboraziun cun la Cooperativa Turistica Alta Badia.

Dolomites Star Party
N planetar cun la realté virtuala a Al Plan, serades por ti ciaré ales stëres a San Ciascian y na gran osservaziun de stëres y planec sön Börz. Chësc é le Dolomites Star Party dai 11 ai 19 d’agost
En ocajiun dl Dolomites Star Party, che vëgn tigní tla Val Badia cun apuntamënc a San Ciascian, Al Plan y sön Börz, podarán descurí les carateristiches dl cil adöm cun deplü esperc y apascioná. Tratan i dis dai 11 ai 19 de agost gnarál pité n program rich de incuntades y ocajiuns por ti ciaré ales stëres.
Planetar a Al Plan: sëres debann por residënc
Tl salf dles manifestaziuns d’Al Plan podarán osservé i planec y les costelaziuns te n iade fora por l’univers y le tëmp tres la realté vir­tuala, cun le planetar da Verona. Chisc dis podarán tó pert a presen­taziuns, dales 17:30 ales 19:00 y dales 21:00 ales 22:30, tl planetar. Les domënies ai 11 y ai 18 d’agost dales 21:00 pó düc i residënc dla Val Badia tó pert debann. Al é da se prenoté tl ofize turistich d’Al Plan al 0474 501037.
Ciaré les stëres a San Ciascian
Ai 12 y ai 19 de agost dales 22:00 inant pón tó pert al’osservaziun dles stëres, di planec y dles costelaziuns, ite a Sciaré a San Ciascian, adöm a Enrico.
Gran osservaziun sön Börz
Le highlight dl Dolomites Star Party é dessigü la gran osservaziun dles stëres sön Ju de Börz, la jöbia ai 14 d’agost dales 21:00 ales 23:00, acompagnada da n conzert de clavier. Por chësta sëra vëgnel pité n sorvisc de shuttle cina sön Börz. Sce al foss bur’ tëmp, vëgn l’osservaziun spostada al de do. Les prenota­ziuns por les osservaziuns y por le shuttle da jí sön Börz mëss gní fates ti ofizi turistics d’Al Plan, San Martin o dl’Alta Badia (ince online sön le sit www.altabadia.org).

Isté sön dlacia
N valgügn atlec de livel internazional sciöche ince l’Ice Club Alta Badia mostrará n spetacul sön la dlacia, en mertesc ai 13 de agost a Corvara
En mertesc ai 13 d’agost portará dant les jadinadësses y i jadinadus dl Ice Club Alta Badia n spetacul sön la dlacia dal titul »Dream«, tl stade a Corvara.
Lapró podarán ince odëi n valgügn atlec profescionisć sciöche Loena Hendrickx – campionëssa europea, Matteo Rizzo, i dui pers Charlene Guignard cun Marco Fabbri y Rebecca Ghilardi cun Filippo Ambrosini, sciöche ince le per de jadiné acrobatich Annette Dytrt y Yannick Bonheur.
I atlec conesciüs a livel internazional sciöche ince i atlec jogn dl post y le grup de jadiné sincronisé »Ice Angels Team« portará dant salc, figöres y spetacui acompagná da musiga. Les chertes d’entrada pón cumpré bele danfora ti ofizi turistics, sön la plata internet dl’Alta Badia o diretamënter la sëra dla manifestaziun, dales 20:30 inant.
Le prisc é de 24,00€ dai 15 agn insö y 12,00€ por mituns da 7 a 14 agn. Chi sot a 7 agn pó ite debann.

Conzert cun le »Ludus Quartet«
Le festival Badiamusica vá inant le lönesc ai 12 d’agost dales 21:15, te dlijia de Badia
Da aldí sarál le »Ludus Quar­tet«, metü adöm da An­drea Ferroni y Ivo Cre­paldi ala vidora, Alexander Monteverde ala viola y Ivo Brigadoi al cello, cun Franz Comploi al orghe. Te chë­sta sëra podarán aldí operes de Domenico Scar­latti, Luigi Boccherini y Antonio Soler.
L’orghelist cunta debo­riada cun le cuartet l’epo­ca te chëra che Soler á cone­sciü impröma Scar­latti y spo Boccherini, pro la curt y la tlaustra El Escorial a Madrid.

»Organ Recital« te dlijia de Badia
Leonhard Tutzer é le protagonist dl conzert d’orghe che vëgn tigní ai 19 d’agost
Le Festival Badiamusica röia ai 19 d’agost a so sesto apun­tamënt dla sajun, cun le »Organ Recital« che vëgn tigní dales 21:15 te dlijia de Badia.
Al so­nará l’orghelist Leon­hard Tutzer da Balsan, che s’á diplomé tl con­servatore »C. Monte­verdi« y s’á perfezioné tla »Hochschule für Musik und darstellende Kunst« a Viena. Tl conzert a Badia portarál dant operes che Johann Sebastian Bach á com­ponü tles fases des­valies dla vita. O sciöche al stá scrit söl pro­gram: »Bach por jogn y vedli, cun musiga dl Bach jonn y dl Bach vedl«.

Festa alaleria a San Martin de Tor
L’Uniun dla Musiga da San Martin de Tor inviëia dër bel düc canc ala festa alaleria, ai 14 y 15 de agost, sön plaza dl paiun
Le program dla festa mët man le mercui ai 14 dales 17:30 cun la daurida dla festa y poscibilité da cené. Dales 19:00 inant él spo intratignimënt musical cun »Idemorveia«. La jö­bia ai 15, festa de Santa Maria dal Ciüf, él sam­bëgn la poscibilité da marné y da cené. Dales 12:00 él la Musiga da Jaufental che tëgn conzert y dales 15:00 inant él mu­siga da bal cun Ossi de Lipo. Ai 15 gnarál ince organisé n valgügn jüc por mituns y mitans.