La Usc di Ladins

Fascia Panorama Music
L Festival de musega ve speta coi ultimes apuntamenc a La Grenz ai 18 e ai 24 de aost da sera coi Popcorner e la Jam session e al gran final con Alba Armengou sun Ciampedie en domenia ai 25
La sociazion La Grenz de Enrico Tommasini, en colaborazion coi impianc portamont e l sostegn de la Region Trentin Sudtirol, la Provinzia de Trent, l’Apt e l Comun General de Fascia, à metù adum ence chest an n rich calandèr per l »Val di Fassa Panorama Music«, l festival de musega che sporc conzerc sa mont e ti locai e paijes de la val. Ence chesta edizion ge dèsc lèrga a artisć de noscia valèdes e de autra mendranzes.
I ultimes apuntamenc sarà en domenia ai 18 e en sabeda ai 24 de aost te la bela senta de La Grenz, te strada Saslonch a Moena, ola­che da les 21:30 ai 18 se podarà scutèr l grop fascian Popcorner e ai 24 sarà la Jam Session.
L ultim apuntament l é de chi da no se perder: en domenia ai 25 de aost da les 11:30 sun Ciampedie sarà l conzert de la joena Alba Armengou, talent catalan de tromba e ousc da Barcelona, che se aea jà fat cognoscer a Moena con la Sant Andreu Jazz Band de Joan Comorro. Chest’outa la sarà compagnèda da Vicente Lòpez a la chitara e Tramel Levalle a la percuscions.

Conzert disco cun la Müjiga da La Ila
N

• 
•  

View the embedded image gallery online at:
https://www.lausc.it/manifestazions-y-evenc/27714-manifestazions-atuales-speziales#sigProId6acfc9c0bb

conzert nü y modern ponsé por fá balé l’ascutadú sciöche te n local da festa
Musiga da balé, melodies conesciüdes che vignun cianta para, löms che roda, n bun drink tla man, … sunse mo te discoteca?
En vëndres ai 23 de agost él la Müjiga da La Ila che inviëia düc a n conzert particolar ala­leria, tl zënter de paisc. Al vëgn porté dant toc plëgns de ritm soná dala musiga y ciantá dala ciantarina Lucia Kastlunger, che portará l’ascutadú te n’atmosfera da discoteca.
L’intratenimënt musical gnará tres indô baraté jö tratan la sëra danter la Müjiga adöm ala ciantarina y DJ Elf. Tratan la sëra gnarál dé fora da bëre dal grup di Jogn La Ila.
La Müjiga da La Ila, Lucia Kastlunger, DJ Elf y i Jogn La Ila en colaboraziun cun la Cooperativa Turistica Alta Badia ves aspeta dales 21:00 tl parch sot ala Scora de schi La Ila por le conzert »A night at the disco«.
Tl caje de bur’ tëmp vëgn le conzert sposté ala sabeda ai 24 de agost.

I jun a munt
A La Val na escurjiun por descurí les tradiziuns y i laurs da paur da zacan
En domënia ai 18 de agost vëgnel metü a jí a La Val la manifestaziun »I jun a munt«. An á la poscibilité da conësce da daimpró les tradiziuns, la spëisa y i laurs da paur sciöche ai gnô fac plüdadî. La escurjiun fora por i pra de Rit mët man dales 09:00 a Ramëi sura Spëscia. Pro la pröma staziun adöm ala Uniun di Paurs, podarán descurí deplü sön le laur da paur da inlaota y da incö. Fora por le percurs ne manciarál sambëgn nia spezialités gastronomiches tradizionales dër scëmples sciöche polënta cun ciajó, liagnes sfomiades, cioce y pücia, gnoch da ciajó cun capüc, sciöche ince val’ de duc, da pert de deplü uniuns. Sö Ciavaza sarál n pice stont alestí dai colaboradus dla Ciasa dl Parch Natural, che porta dant plü tematiches che reverda les Dolomites Patrimone Mondial UNESCO, i pra da munt y la biodiversité. Pro la terza staziun sarál la Musiga che pîta intratignimënt y olache al vëgn ince cujiné polënta. Al sará spo les Patrones che arjigna bales da ciajó cun capüc. Püch dan la Crusc da Rit podarán fá na picera palsa dal domisdé y dedô sarál la Jonëza da Paur che mostra sciöche an fej ite le fëgn dala manira plü tradizionala ala forma plü moderna. Dales 13:00 y dales 14:00 podarán ince senté n lëgn y imparé deplü sura le remboscamënt. Pici y gragn é dër bel inviá a tó pert ala manifestaziun, che impormët da conësce la vita da zacan. Sce al foss bur’ tëmp, vëgn la manifesetaziun desdita.

»Organ Recital« te dlijia de Badia
Leonhard Tutzer é le protagonist dl

• 
•  

View the embedded image gallery online at:
https://www.lausc.it/manifestazions-y-evenc/27714-manifestazions-atuales-speziales#sigProId6acfc9c0bb

conzert d’orghe che vëgn tigní ai 19 d’agost
Le Festival Badiamusica röia ai 19 d’agost a so sesto apun­tamënt dla sajun, cun le »Or­gan Recital« che vëgn tigní dales 21:15 te dlijia de Badia. Al sonará l’orghelist Leonhard Tutzer da Balsan, che s’á diplo­mé tl conservatore »C. Monte­verdi« y s’á perfe­zioné tla »Hochschule für Musik und darstellende Kunst« a Viena. Tl conzert a Badia por­­tarál dant operes che Johann Sebastian Bach á componü tles fases desvalies dla vita. O sciöche al stá scrit söl program: »Bach por jogn y vedli, cun musiga dl Bach jonn y dl Bach vedl«.

»Song Recital« a Al Plan
Renzo Huber y Hilko Dumno se lascia aldí ai 28 d’agost, tl salf dla Scora de Musiga d’Al Plan
Le festival Badiamusica pîta n conzert particolar en mercui ai 28 d’agost dales 21:00, tl salf dla Scora de Musiga d’Al Plan. Pro chësc »Song Recital« sarál da aldí le ciantarin d’Al Plan Renzo Huber (tenor) deboriada cun Hilko Dumno dala Germania al piano. Te chësta serada podarán ascuté sö operes de Ludwig van Beethoven (1770 – 1827), Felix Mendelssohn Bartholdy (1809 – 1847) y Robert Schumann (1810 – 1856), che trata dötes la tematica dl incherscimun do l’amur che pe nia da arjunje. »Chëstes cianties nes lascia despassé ia lerch y tëmp, sciöche i somi«, impormët le program.

»Miniatures« a Badia
Le festival Badiamusica inviëia ai 29 d’agost a Badia, por ascuté sö musiga fina cun les »Girandole Armoniche«
Esther Crazzolara ala vidora, Teodoro Baù ala viola da gamba y Federica Bianchi al clavicembalo forma debo­riada les »Girandole Armoniche« – le trio che jará sön paladina tla Ciasa Runcher a Badia, en jöbia ai 29 d’agost dales 20:30. Te chësc conzert, che fej pert dl festival Badia­musica, gnarál pité deplü ejëmpli de na sort de musiga che gnô definida tla Germania dl 18ejim secul sciöche »Sonate auf Konzerten­art«, olache le conzert gnô tigní cun na for­maziun smen­drida y plü intima. Sot al titul »Minia­tures« gnarál pité toc de Gerg Philipp Telemann, An­tonio Vivaldi, Jean – Philippe Rameau y Johann Sebastian Bach.

Entorn Vich
L Comitat manifestazions Vich Events endreza l ultim apuntament coi saores e la tradizions ladines en jebia ai 22 de aost
L Comitat manifestazions Vich Events, en colaborazion con l Agritur Soreie, l’Azien­da Agricola Masc Aloch, la Mèlga de Fascia, l Consorzie Cembrani DOC, l Agritur Fiores, la Cianeva de la Sgnapa, la becaria Pellegrin e El Pech, endreza en jebia ai 22 de aost l ultim apun­tament de chest istà de Entorn Vich.
Con scomenz da les 19:30 se podarà fèr cater tapes fora per l paisc per cercèr n piat dantfora con scialames e formaes, n prum piat che se pel cerner anter supa da orc o gnoches, n bon piat de polenta, crauc e lianie e per fenir na fieta de strudel, dut con apede n vin, suches o sciropes arte­janèi o na sgnapa.
Anter n piat e l auter se pel veder veies mestieres, ejibizions de gropes folk e scutèr de bona musega, esposizions de operes e ogec e per i più picoi sarà ence jeghes. Dut chest te mez paisc de Vich. L cost del biliet l é de 35 euro, 25 euro chel zenza alcol. Per infor­ma­zions www.vigodifassa eventi.it.

»Mostra & aperitif«
Le Museum Ladin Ciastel de Tor pîta na vijita menada ala mostra speziala y dedô aperitif cun musiga dal ví. Ai 22 d’agost sonará le grup »L Vin y l Din«
Le Museum Ladin inviëia al’ultim apuntamënt cun »mostra & aperitif«, en jöbia ai 22 de agost. Al vëgn pité vijites menades fora por la mostra »Countdown to Mass Extinction?« cun le curadú Herwig Prinoth, dales 15:00 ales 16:00 por todësch y dales 16:00 ales 17:00 por talian. Dales 17:00 inant podëise ves gode la sëra sön la terassa panoramica dl Museum Ladin Ciastel de Tor cun n bun aperitif y musiga dal ví cun »L Vin y l Din«. Por la vijita menada, che costa 10,00€ (cun entrada al musum Ciastel de Tor lapró) vëgnel perié da s’anunzié a prenotaziuns@musemladin.it o al 0474 524020. La jöbia ai 29.08 vëgnel proponü na vijita menada, zënza aperitif.

150 agn Dlijia La Val
Da incö inant na edema de apuntamënc, che se stlüj jö cun na gran festa ai 25 de agost
Dai 16 ai 25 d’agost vëgnel metü a jí a La Val cotan de iniziatives por recordé i 150 agn dla dlijia de paisc. Chësc é le program:
vëndres 16.08. dales 17:00: Vijita te dlijia cun guida de Danila Serafini;
sabeda 17.08. dales 20:30 te dlijia: conzert dl Cor La Val »Laetare« (ciara info a pert);
lönesc 19.08. dales 20:30 te ciasa dles uni­uns: film de siur Josef Hurton;
mercui 21.08. dales 20:30 te ciasa dles uni­uns: »La Val cunta«, proieziun de fotografies;
sabeda 24.08. dales 20:30: iluminaziun y conzert dles musighes da La Val y Wengen (Allgäu) sön plaza de Comun;
domënia 25.05. dales 9:00: festa y mëssa solëna cun nosc Vësco; dedô conzert da festa y aperitif sön plaza.

De di corëc
Le Museum Ladin inviëia en vëndres ai 23 d’agost al de dediché ai corëc: vijites menades danmisdé, escurjiun domisdé
En gaujiun dl De di corec, ai 23 de agost, vëgnel pro­ponü danmisdé, dales 10:00 ales 12:00, na vijita menada ala mostra temporana »Count­down to Mass Ex­tinction?«, adöm a na vijita al MusLa Ciastel de Tor. Domisdé condüj le paleon­tologh Herwig Prinoth a na escurjiun menada söl Ju de Börz. Prenotaziun obligatora al 0474 524020, o ala e–mail prenotaziuns@museumladin.it
Informaziuns plü menü­des sön la plata internet www.museumladin.it.

»Laetare«: conzert a La Val
Chësta sabeda ai 17 d’agost vëgnel tigní te dlijia da La Val n conzert por i 150 agn dla dlijia
Le Cor La Val cun orchestra sot ala direziun de Elio Clara y le grup de stromënc a fle »Brass« ves inviëia dër bel al conzert sacral »Laetare«.
Le conzert vëgn tigní en gaujiun dl iubileum di 150 agn dla dlijia, porchël le moto »Ralegresse«! Al vëgn porté dant la »Missa Solemnis« en C y le »Regina Coeli« en B de Wolfgang Amadeus Mozart. Implü lasciará la orchestra aldí la »Sonata« en C dl medem componist y le grup »Brass« sonará amezite n valgügn toc a fle.
Chëstes melodies da festa podëise gní a d’ascuté sö la sabeda ai 17 d’agost dales 20:30 tla dlijia da La Val.