La Usc di Ladins

»Sëra«, simposium d’ert
Dai 31 d’agost ai 6 de setëmber 2024 inviëia le Circolo Lia Mostra d‘Ert en colaboraziun cun l’EPL-Ert por i Ladins al simposium »Sëra«. Al é la resposta creativa ala mostra coletiva »Äres« stada d’isté a Urtijëi
Na schira de arrtistes y artisć sará por otedé alalungia a San Martin de Tor tl labo­ratore dl Istitut Ladin por se dé jö, se lascé ispiré y cherié laurs söl monn suge­stif y la magia dla sëra.
Porsones interessades y corioses dl proiet pó jí a ciaré pro le svilup di laurs. Por la sabeda ai 7 de setëm­ber él spo preodü la daurida dla mostra di laurs che restará daverta por otedé dales 10:00 ales 12:00 y dales 15:00 ales 18:00.

Copa dla Talia sun Pana
Ai prim de setëmber saràl la garejeda de saut cun i schi per la junanza
La disciplina sportiva dl saut cun i schi à si ravises tl 18ejim secul tla Norvegia, ulache saudeies sautova ju per tëc de cëses y tublei tla provinzia Telemark, aldò dl liber dl olandesc Cornelius de Jong scrit tl 1796.
Al didancuei vëniel fat saut cun i schi d’inviern y d’instà. Suvënz vëniel nce fat garejedes de cumbinazion nordica che vën purtedes ora fajan saut cun i schi sun la nëif y pudejé d’inviern y saut cun i schi sun n fonz de plastica y sauté a pe o jì cun i skiroll d’instà.
Na ucajion unica per amiré l saut cun i schi d’instà ie la garejeda de Copa dla Talia per la junanza (per chi che ie nasciui danter l 2016 y l 2011) che sarà n dumënia ai 1. de setëmber 2024 sun Pana. L fajerà pea duta la scuadres de saut dla Talia y l unirà adalerch atlec y atletes da Pellizzano, Tarvisio, Predazzo y de Gherdëina.
L scumenciamënt dla garejeda sarà n dumënia ai 1. de setëmber dala 9.30; daldò saràl mo la garejeda de sauté che vel coche cumbinazion nordica.
Nvion duc a unì a ti cialé ala garejeda. Nce da bever y da maië ne manceràl.

Cursc cun Pia Pedevilla
Trëi cursc por mituns y mitans (acompagná), insegnanc y adulc, tl atelier a Bornech
Porzelana frëida
Sabeda al 31 de agost dales 14:00 ales 18:00. Al vëgn fat fëies portaciandëres, de pices copes, motifs desvalis da taché sön finestra, chedri cun cörs y vicí.
»Girls«
Domënia al 1. de setëmber dales 14:00 ales 18:00. Al vëgn fat unicorns, fates, balarines, prinzësses de lëgn, spidli y scatores depëntes. Al ne manciará nia gliter, perles y vëtes.
Tiers dla jungla
Sabeda ai 7 de setëmber dales 14:00 ales 18:00. Al vëgn fat liuns, koala, tigres, panda, tucans, camaleuns y scimies de lëgn.
I cursc vëgn metüs a jí en cola­bo­raziun cun l’EPL y vëgn tignis tl atelier de Pia Pedevilla (Gross Gerau Promenade 6c) a Bornech. Ai costa 60€ plü za. 25,00€ de material. Al vëgn tut sö 6 partezipanc a curs (i acompagnadus ne paia nia). Info y iscriziuns pro Pia Pedevilla al 348 2221745 o info@piapedevilla.com

Conzert »Days of beauty«
Le cor Kerygma y l’Orchestra Val Badia inviëia a conzert, ai 25 d’agost te dlijia de Badia
En domënia ai 25 de agost dales 20:30 tëgn le cor Kerygma adöm ala Orchestra Val Badia n conzert tla dlijia de Badia. Tratan le conzert dal titul »Days of beauty« sarál da aldí deplü cianties che reverda l’amizizia, la pesc, l’unité y la ligrëza. Al gnará porté dant n aranjamënt dla 9° sinfonia de Beethoven »Ode an die Freude«, por recordé i 200 agn dala pröma esecuziun. Söl orghe sarál da aldí Agnes Irsara; la direziun é de Bruno Rives.

Oste cianté pro n conzert particolar?
Bo y müsc chir ciantadus y ciantarines dla Val Badia por n conzert da Nadé
En colaboraziun cun Simon Kostner y le Cor Pices Usc d’Al Plan vëgnel arjigné ca n conzert da Nadé dër particolar, te deplü stii musicai. Al vëgn porchël chirí ciantadus y ciantarines dala terza elementara cina ala terza mesana de döta la Val Badia. Les cianties vëgn com­ponüdes aposta por chësc conzert y i mituns y les mitans ciantará adöm a na band de musizisć profescionisć. Te na aldiziun a pert gnarál implü chirí fora chi 5–10 solisć.
I conzerc gnará tignis ai 14 y 15 de de­zëmber, tla Ciasa dla Cultura a La Ila y damperfora vëgnel fat na CD te stüde. Les proes sará vigni jöbia, dai 12 de setëmber inant, dales 17:00 ales 18:00 a Al Plan, te salf dles mani­festaziuns. Les proes generales sará spo ai 12 y ai 13 de dezëmber a La Ila. Tolede chësta oca­jiun y lascesse aldí cina ai 30 d’agost sot al link https://forms.office.com/e/X4L dSwp6FJ o al nr. 340 6213637, olache an ciafa ince informaziuns plü avisa.

»Song Recital« a Al Plan
Renzo Huber y Hilko Dumno se lascia aldí ai 28 d’agost tl salf dla scora de musiga d’Al Plan
Le festival Badiamusica pîta n conzert particolar en mercui ai 28 d’agost dales 21:00, tl salf dla Scora de Musiga d’Al Plan. Pro chësc »Song Recital« sarál da aldí le ciantarin d’Al Plan Renzo Huber (tenor) deboriada cun Hilko Du­mno dala Germania al piano. Te chësta serada podarán ascuté sö operes de Ludwig van Beethoven (1770 – 1827), Felix Mendelssohn Bartholdy (1809 – 1847) y Robert Schu­mann (1810 – 1856), che trata dötes la tematica dl incher­scimun do l’amur che pe nia da arjunje. »Chëstes cianties nes lascia despassé ia lerch y tëmp, sciöche i somi«, impormët le program.

»Miniatures« a Badia
Le festival Badiamusica inviëia ai 29 d’agost a Badia, por ascuté sö musiga fina cun les »Girandole Armoniche«
Esther Crazzolara ala vidora, Teodoro Baù ala viola da gamba y Federica Bianchi al clavicembalo forma de­boriada les »Girandole Armoniche« – le trio che jará sön paladina tla Ciasa Runcher a Badia, en jöbia ai 29 d’agost dales 20:30.
Te chësc conzert, che fej pert dl festival Ba­diamusica, gnarál pité deplü ejëmpli de na sort de musiga che gnô definida tla Germania dl 18ejim secul sciöche »Sonate auf Konzertenart«, n conzert cun na formaziun smen­drida y plü intima. Sot al titul »Minia­tures« gnarál pité toc de Gerg Philipp Telemann, An­tonio Vivaldi, Jean – Philippe Rameau y Johann Seba­stian Bach.

Musighes ciantades de »Trëi«
Le festival Badiamusica vá a piz al 31 d’agost a La Val, cun le conzert dl grup »Trëi«
En sabeda al 31 d’agost dales 20:30 él te salf dles manifestaziuns da La Val l’ultim conzert dl festival Badia­musica 2024. Sön paladina podarán aldí le grup »Trëi«, metü adöm da Abélia Nordmann (usc y armonium), Gizem Şimșek (usc y saltier) y Mara Miribung (usc y cello).
Ëres che pita, efons, ëres che dij danfora le dagní y stries. Te chësc program cianta »Trëi« les cianties de chës ëres che verda pro i lec di vis y di mo­rënc; cornidles, corf y agaces acompagnëia sües stories y cianties. »Trëi« se dá jö te na manira poetica y onesta cun por­secuziun, auto­risaziun y feminilité.

Presentaziun: »Monumënc de pera«
En vëndres ai 30 d’agost vëgnel presenté tl Museum Ladin a San Ciascian le liber de Mario Clara
»Monumënc de pera – incisioni rupestri nelle Dolomiti e in Sudtirolo« se tlama le liber de Mario Clara da Lungiarü, gnü fora dan püces edemes. Laite documentëiel peres da copes y d’atres peres particolares laurades da jënt dan cënc d’agn, che rapresentëia fostüs de tëmps dadî passá.
En vëndres ai 30 d’agost dales 18:00 vëgn le liber presenté tl Museum Ladin Ursus la­dinicus a San Ciascian. La presentaziun gnará fata por talian, l’entrada é debann.

Mostra de fotografies söles Dolomites
A Corvara él da odëi cina ai 13 de setëmber la mostra »Dolomiten«, metüda en pe dai fotografs dla natöra de Südtirol »Strix«
Le grup di fotografs dla natöra de Südtirol »Strix« á metü adöm la magia dles Dolomites te tröpes fotografies, dal plü pice tier al plü gran crëp. Les foto­grafies é na desmostraziun de amur devers les Dolomites – chësta contrada unica tles Alpes. Impresciuns sugestives y particolares pón ciafé tla mostra »Dolomiten«, che é metüda fora tl salf dles mani­festaziuns da Corvara. Ara é daverta cina ai 13 de setëmber, dal lönesc ala sabeda dales 8:00 ales 12:00 y dales 15:00 ales 19:00; la domënia y i santus dales 9:00 ales 12:00 y dales 16:00 ales 18:00.

Conzert disco cun la Müjiga da La Ila
N conzert nü y modern ponsé por fá balé l’ascutadú sciöche te n local da festa
Musiga da balé, melodies conesciüdes che vignun cianta para, löms che roda, n bun drink tla man, … sunse mo te discoteca?
En vëndres ai 23 de agost él la Müjiga da La Ila che inviëia düc a n conzert particolar ala­leria, tl zënter de paisc. Al vëgn porté dant toc plëgns de ritm soná dala musiga y ciantá dala ciantarina Lucia Kastlunger, che portará l’ascutadú te n’atmosfera da discoteca.
L’intratenimënt musical gnará tres indô baraté jö tratan la sëra danter la Müjiga adöm ala ciantarina y DJ Elf. Tratan la sëra gnarál dé fora da bëre dal grup di Jogn La Ila.
La Müjiga da La Ila, Lucia Kastlunger, DJ Elf y i Jogn La Ila en colaboraziun cun la Cooperativa Turistica Alta Badia ves aspeta dales 21:00 tl parch sot ala Scora de schi La Ila por le conzert »A night at the disco«.
Tl caje de bur’ tëmp vëgn le conzert sposté ala sabeda ai 24 de agost.

Roda salvaria a Calfosch
N apuntamënt gastronomich tl parch dai tiers a Calfosch, cun ativités por pici y gragn
En mercui ai 28 d’agost vëgnel metü a jí la manifestaziun gastronomica »Roda salvaria«, tla cornisc particolara dl parch dai tiers a Calfosch. Cater strotöres dl post arjigna ca, dales 16:00 ales 21:00, de vigni sort de spe­zialités gastronomiches locales sciöche cajincí arestis, crafuns mori, panicia, bales da urties, dlacins, panins dl iagher y tröp d’ater. Tratan le domisdé ves aspetarál intra­tignimënt musical adöm al »Duo Gota« y le grup »Vollgas«, sciöche ince n program de ativités speziales: al gnará mostré sciöche an cöj le pan tl vedl furn, an pó ince se informé sura le chefer dla scorza – pro le stont dla forestala, y sura la flora y la fauna cun i esperc dl parch natural. I mituns pó se lascé depënje sö le müs dales 17:00 ales 21:00 y al vëgn pité n program didatich sura le lüch da paur, dales 18:00 ales 19:00. Sce al ess da ester bur’ tëmp, vëgn la manifestaziun spostada ai 30 de agost.

Concurs »Aisciüda«
Le Fotoclub Val Badia mët a indô a jí le concurs de fotografia, davert a düc, cun le tema »Aisciüda«. Termo por mené ite é i 15 de setëmber
Ince chësc ann él le Fotoclub Val Badia che mët a jí le concurs de fotografia davert a düc, sot al tema »Aisciüda«. Vigni partezipant y partezipanta pó dé jö alplü 5 fotografies son chësc tema, meton pro vigni fotografia n titul/descriziun. Al mëss ince gní scrit fora le do­cumënt che an ciafa da desćiarié sot ala plata internet. Sön les fotografies instësses ne pól ester degüna descriziun o inom. La partezi­paziun al concurs é debann y les fotografies é da mené ite anter i 15 de setëmber. Les foto­grafies pó gní dades jö sön CD/DVD, USB – stick o cun le sistem www.wetransfer.com ala mail fotoclubvalbadia@rolmail.net.
Les fotos mëss avëi almanco 5 mega pixel. Les fotografies sön CD/DVD o USB – stick mëss gní menades te na busta stlüta al: Fotoclub Val Badia, Str. Pares 10, 39030 La Val.
Les plü beles fotografies gnará lasciades stampé y metüdes fora tla mostra de fotografies dal medemo titul dl concurs, che gnará me­tüda a jí dal Fotoclub ai 9 de novëmber 2024. Premié vëgnel i fotografs dal 1. cina al 10. post. Informaziuns plü menüdes ciafon sön la plata internet www.fotoclubvalbadia.itPublichedes tla edizion dl 16 de agost 2024