La Usc di Ladins

Vedon la lum. Dò chest temp senester de carantena che ne à tegnù duc, con vèlch picola ecezion, seré te noscia cèses, somea che pian pian vèlch sie dò a mudèr. Nesciugn se spete de scomenzèr con la vita che aane dant, ma dò aer passà chesta proa ogne picola conquista sarà vèlch da bel. Per chest, te noscia roda de intervistes aon volù chest’outa scutèr Roberto Pasero, joen arcedador atletich de Moena clasc 1993, che ne à contà de sie lurier te chest temp senester e dat vèlch consei per scomenzèr endò da nef a fèr sport a la lèrgia. Maester de Scienzes del moviment te la scola populères de Fascia, Roberto l'é ence maester de paslonch a Falcade e acedador atletich con desvaliva sozietèdes sportives ajache l laora en colaborazion col Ski Team Fascia, col Ski & Ice College e col setor di joegn del Fascia Falcons, arcedan atlec de schi, brea, freestyle e hockey.

Co éla stata che t'ès cernù la strèda de l’arcedador atletich?

Roberto Pasero: L sport l’é semper stat al zenter de mia vita. De 8 egn é tacà a corer ensema a mia familia, me piajea n muie, fajee garejèdes de ogne sort e i resultac era ezelenc. De 10 egn é proà l paslonch e l’é stat sobito amor: me é enscinuà tel Ski College de la Scola Ladina de Fascia e ere tel grop del Comitat Trentin. Per desgrazia, no son stat bon de me arsegurèr n post te n corp militèr, donca é dezidù de lascèr l sport agonistich per jir a studièr a l’Università. La strèda no podea che esser Scienzes del moviment e del sport, é studià 5 egn e me é laureà coi resultac più auc. Gé é l'obietif senester de ge trasmeter mia pascion per l sport ai più picoi, de ge fèr capir che l sport fèsc stèr ben e che se mever l’é de utol per sie davegnir e l'é per arjonjer chest obietif che é volù lurèr desche arcedador atletich e dozent de educazion motoria. Son stat bon de tramudèr mia pascion te n lurier e son dassen content e stolz de chel che fae.

Se pel lejer duta l'intervista su La Usc stampèda de jebia ai 30 de oril 2020.

 (Daniele Verra)