La Usc di Ladins

L é oramai na tradizion per la sociazion Cheghes de Fascia, tel temp fora de sajon, endrezèr ocajions de formazion e agiornament profescionèl per si sozi, con chef profescionisć e de spes spezialisé te n setor particolèr de magnadiva. 

Chest’outa, inant che pee endò via la sajon da d’invern, l president de la sociazion Ferruccio Tomasi, col didament per l endrez del sozio Sandro Favé e la colaborazion de l’APT de Fascia, l à endrezà n event spezièl, che al cors formatif l à metù apede na ocajion de promozion per la comunanza e na scomenzadiva de solidarietà.
En vender ai 15 de november via per l inant mesdì na ventina de cheghes fascegn à podù tor pèrt ló dal Hotel Majaré de Poza a n cors col chef Simone Rugiati. 
Rugiati, cognosciù al gran publich soraldut per sia partezipazion a programes televisives desche »La prova del cuoco« o »Cuochi e fiamme« e tropes etres soraldut sui canai tematics, l é ence autor de publicazions e diretor de rivistes de cojina e l se conscidra l inventor del ‘showcooking’.
Coi cheghes fascegn l à pissà e sperimentà desvaliva rezetes olache la tradizions del post se conjobia con proponetes inovatives e de etres lesc. Con chesta rezetes i cheghes fascegn à dapò enjignà da sera, te la sala con cojina de la Coprativa de Fascia a Soraga, n rich desch de ‘finger food’, che de tropes à podù cercèr a la fin de na scontrèda col chef de nonzech.
Te chesta sera, che à conjobià cultura del magnèr e solidarietà, Simone Rugiati à rejonà de sie leam con n paisc del Kenya, Watamu, olache l é stat e l à cognosciù ne realtà pureta ma de gran umanità, che l à dezidù de didèr.

De più su La Usc stampèda de en vender ai 22 de november.  (Lucia Gross)