La Usc di Ladins

Ence chest an, enceben che mingol de pievia aesse scecà proprio la sera de en mèrtesc ai 14 de aost, beleche 500 gregn e picoi coridores no à volù mencèr al envit de jir coran da sera fora per la strèdes de Moena, tolan pèrt al »Giro de le notole« endrezà da la U.S. Monti Pallidi en colaborazion col Comun de Moena e con desvalives sponsor e ruà encomai a la 49^ edizion.

Peé via da Piaz de Sotegrava da les 9 da sera, chest bel grop de atlec à sgolatà sul percors de 6 chilometres per ruèr de retorn endò tel piaz tedant a la senta del Comun dant da les 22:30, en temp per la zerimonia de premiazion. Na premiazion desche semper dassen rica, coi miores de ben 10 categories chiamé sun paladina dal president de la Monti Pallidi, Carlo Ganz, a se tor l pest e l batiman.

Chest’outa anter duta la notoles a moscèr de saer sgolèr più en prescia l é stat doi »Cornacci«: al prum post te nience 22 menuc l é ruà defat Nicolò Zorzi, clas 1995, arjont nience mez menut do dal compagn de la sozietà sportiva de Tieser Stefano Mich, clas 1993. Terzo post per Damiano Casagranda de l’Atletica Valle di Cembra che per 20’’ l ge à sofià l post sul podie a Luca Ceolan, atlet de la sozietà moenata organisadora.

Anter eles l prum post, col temp de 26’ 55’’ é jit a l’atleta Sophie Maschi, e pech più che mez menut do l é ruà la joena de 14 egn da la Svezia Astrid Persson. Terzo post per l’atleta de cèsa Giulia Dallio de la Monti Pallidi, restèda sot i 28 menuc.

De più, coi miores de vigni categoria, su La Usc stampèda de en vender ai 23 de aost.   (Lucia Gross)