La Usc di Ladins

La hala dala dlacia da Porsenú á ospité tla fin dl’edema passada la finala dla Copa Italia de jadiné por la fascia gold. Do na seleziun de passa 200 iscric tles categories desvalies, él ince sté na bela cumpëda de jadinadësses y jadinadus ladins che á podü tó pert, condujon a ciasa la belëza de cater podesć: dui por la Val Badia y dui por Gherdëna. I dui podesć badioc é garatá tla "Advanced Novice" di ëi, olache Alessandro Giuliano (che s’alenëia pro le CPA da Trënt), á arjunt na bela devënta y insciö le titul nazional cun 94,67 punc. Al 3. post le secundo badiot, Felix Oberbacher dl Ice Club Alta Badia, che á metü a saul le podest cun 88,61 punc. Danter i dui ladins s’á plazé cun 92,29 punc Denys Kovalenko dl club "Ghiaccio Mezzaluna" da Roma. Les jadinadësses ladines se l’á spo fata avarëi tla "Intermediate Novice" feminila, cun dui podesć söl cunt dl "Eisclub Gherdëina". Al é chël de Annasofie de Geest che é gnüda secunda y insciö vizecampiona cun 38,47 punc, tratan che Sara Perathoner á fat la medaia de brom cun 37,89 punc. Davagné á Asia Sudati dla "Artistique Valle D’Aoste" cun 38,74 punc.  (pablo)