La Usc di Ladins

En mercol ai 2 de oril l é peà via a Moena na rassegna de scontrèdes con autores de nosc raion. L’à inom »Troes/Sentieri« ajache, descheche à dit la vizeombolta e assessora a la cultura del Comun Cristina Donei tel averjer l prum apuntament, l’idea l é chela de fèr n toch de strèda con autores de nosc raion per descorir con ic libres, storia e teritorie. N percors che nasc da la colaborazion anter l Comun e la Biblioteca de Moena con l obietif, l’à jontà ite la responsabola Valentina Manica, de l meter a jir amò ti meisc fora de sajon, per jir desche do n troi da mont a cognoscer autores e paroles.
Apontin con paroles se à tacà te la pruma scontrèda, avisa paroles ladines che Fabio Chiocchetti à studià, enrescì e portà dant a na vida curiousa tel liber »Paroles fora de crigna« che l’Union di Ladins de Fascia à dat fora ensema con l’Union Generela di Ladins dla Dolomites. L é stat per l autor la pruma ocajion per l prejentèr te sie paisc, ensema con n auter liber de l’Union, »Letres da Larcioné«, che se à vadagnà ence l pest nazionèl Tullio de Mauro.
La rassegna va inant ai 16 de oril con Graziano Bortolotti che semper da les 17:00 te sala Rovisi prejentarà sie liber »Il ragno«.

De più su Usc nr 14 dai 11 de oril: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (LG)