La Usc di Ladins

No poder jir te cortina a ge fèr n salut a nesc morc l’é un di tenc empedimenc de chest temp, un de chi che peisa trop su la jent. Se sà ampò che tor demez chesta limitazion volessa dir aer sobito pien de jent te cortina, ajache duc d’aisciuda volessa jir a tor demez la eriches e i fornimenc da d’invern oramai veies e smarii, per meter vèlch fior fresch che ge dae na parbuda da d’aisciuda a la fosses. L bon tempram engolardesc amò de più, purampò no se pel e ence la boteighes de fiores endèna no les pel orir.

Per chest l’é stat segur na bela pissèda chela de l’aministrazion del Comun de Mazin de fèr rencurèr sù la fosses dai lurieranc del comun e de ge meter su ogneuna na piantina de violes. Na idea dassen aprijièda dai sentadins, che en cordanza con l Comun de Ciampedel é stata portèda inant ence per la cortina de Ciampedel, olache l’é sepolì ence i sentadins de Ciampestrin e Fontanac.

La proponeta é vegnuda dal vizeombolt Fausto Castelnuovo, che l’aea pissà e tout it ence i etres ombolc ence te la scomenzadiva de ge fèr aer a duc i sentadins, ensema con i couribocia de la protezion zivila, ence n ramet de olif benedì desche segn de Pèsca.

Apede chest l Comun de Mazin, ensema con l’olif, l’à volù fèr ruèr te la majons de duc i sentadins più picoi tel dì de Pèsca ence n ef de ciocolata, portà fora de gra al didament di Studafesch.

Picoi segnes per fèr manco mestie chest temp de carantena, speran che pian pian se posse tachèr, mingol a l’outa e semper con gran prudenza e responsabilità, e jir envers na vita più normala.

 (lg)