La Usc di Ladins

L’é stat cernù la dì de Sèn Jan de Jugn per la benediscion de la Ciampèna de la pèsc, di ladins e de la mendranzes tel mond, che dò desvaliva tapes stroz per la Tèlia, la é stata loghèda sun Ciaslir de Vich a mez anter la cortina de vera e la gejia de Sèn Ugèna, te n lech de gran segnificat per duc i fascegn, che envia a la orazion e a la reflescion.

La Ciampèna é nasciuda da na idea de Leopoldo Rizzi de Poldin, stat ombolt de Vich, del 2017, con chela de zelebrèr duta la picola comunitèdes e la porta dant n segnificat prezis de pèsc e fradaa, che met ensema i popoi e ogne mendranza.

La é stata realisèda del 2019 te la storica berstot Marinelli de Agnone tel Molise, dò la é ruèda a Roma olache l’à ciapà la benediscion de Papa Francesch, l’à fat tapa ence a Assisi, Loreto, Pèdua, a Ginevra te la senta ONU e forin Baissiston, olache la é stata doi egn dant de vegnir te Fascia per sia colocazion definitiva. 

En jebia ai 24 de jugn donca la Ciampèna é stata benedida dal piovan don Andrea Malfatti. L’ombolt de Sèn Jan Giulio Florian à rejonà del valor de l’opera finanzièda dal Comun e l’à deschiarì che l’é stat cernù apontin l lech vejin a la cortina, olache paussa passa 600 sudé morc endèna la Gran Vera, per recordèr duc i popoi del mond che amò anchecondì padesc situazions de conflit e per uzèr fora l’emportanza de viver en pèsc.

De più su La Usc stampèda de vender ai 2 de messèl 2021.  (Cristina Marchetti)