La Usc di Ladins

Laponia: n iade tla natöra
Ai 10 d’otober él le fotograf Sepp Hackhofer che mostra a San Martin impresciuns de n iade tl nord dla Scandinavia
Le Fotoclub Val Badia inviëia en jöbia ai 10 d’otober dales 20:30 tl salf dl Istitut Ladin a San Martin de Tor, a na pro­ieziun de foto­grafies.
Le fotograf Sepp Hackhofer mostrará retrac spetacolars y demor­vëia, nasciüs da n iade tla Laponia che al á fat cun le pulmin, deboriada cun le compagn Hugo Wassermann.
Al mostrará impresciuns de bosć zënza fin, lêc y spo­nes salvaries. Al lascia cuché te na natöra che mostra con­trades spetacolares y n gröm de detais ascognüs: vicí, ciüfs, formes y corusc dl’ega. N iade afascinant te n monn tan dalunc da nüsc raiuns, mo impó cun n gröm de similarités cun la natöra chiló da nos.

Da

• 
•  

View the embedded image gallery online at:
https://www.lausc.it/manifestazions-y-evenc/28024-manifestazions-atuales-speziales#sigProId589d855bea

Blechhauf’n
La sajon nueva di Jëuni de Mujiga Gherdëina à inò scumencià. L prim cunzert sarà dla grupa dl’Austria »Da Blechhauf’n«
N vënderdi ai 11 de utober saràl da scuté su l cunzert dla grupa austriaca »Da Bechahuf’n« dala 20:00 tla Cësa di Cungresc de Urtijëi. Daujin a repre­jentazions cun i strumënc, iel nce pec ulache l unirà ciantà y fat muvimënc de cumedia. L ie nscila nia mé n cunzert, ma nce cabaret de mujiga. Christian Wieder, Christoph Haider Kroiss y Dominic Pessl sona l tumbrëta y l corn, Bernhard Holl la posauna y l’armonica, Philipp Fellner la posauna y la tumbrëta de bas, Markus Wonisch la posauna y Albert Wieder l elicon y la tuba. Unide duc a scuté su l program de cunzert »Well Done« y lascëve tré ite tl prim cunzert de na lingia de cunzerc di Jëuni de Mujiga Gherdëina.

La Scola »Le Muse e le Dolomiti« aur si ujes
Te la senta de Moena, te la sala Simonin Maza de la scoles, via per dut l meis de otober vegn fat lezions de proa debant per i bec dai 6 egn en su
La Scola Interregionèla per emparèr a ciantèr e fèr teater per bec e joegn dai 6 egn en su, proponeta da la Sociazion »Le Muse e le Dolomiti«, se slèria fora e cresc ogne an de più. Dal scomenz del 2024 l’à ciapà l patrozinie emportant del Comun General de Fascia apede a chi de la Magnifica Comunità de Fiem e de duc i Comuns olache l é na senta: Ègort, Ciauril, Ciavaleis, Valada Agordina e Moena. Proprio te la senta de Moena, te la sala Simonin Maza de la scoles, amò via per dut l meis de otober la scola met dant lezions de proa debant per na dì en setemèna, de mèrtesc domesdì. No l é de besegn de aer cognoscenzes musicales: pel proèr duc i bec e joegn. La Scola Interregionèla se met dant de fèr crescer artisticamenter e umanamenter i studenc e la garantesc amò apede ence mo­menc de sozialità e de spas. I resultac l é: se cognoscer miec anter bec de la valèdes de la Dolomites e fèr nascer de neva amicizies e colaborazions. Per info www.musedolomiti.it o chiamèr la maestra Oda Zoe Hochscheid al numer de telefon 342 9147711.

Marcià di libri adurvei de Segra Sacun
Coche l ie bele tradizion meterà la trëi biblioteches publiches dla valeda – San Durich, Tresl Gruber y O. v. Wolkenstein – nce chëst ann a jì l marcià di libri adurvei de Segra Sacun
I libri tëuc ora dala biblioteches – ajache danejei o nia plu atuei – y chëi dunei dai privac unirà vëndui a 1€ per liber. I scioldi che vën trac ite unirà pona inò dac ora per l bën dla trëi biblioteches.
L marcià di libri ie a Urtijëi tla Cësa di Cungresc Luis Trenker dan l ufize dla Lia dl Turism y l scumëncia n lunesc ai 14 de utober dala 8 da duman nchin la 6 da sëira. N merdi ai 15 de utober saràl daviert dala 8 ala 12 da mesdì y dala 2 ala 6 da sëira, n mierculdi ai 16 de utober dala 8 ala 12 da mesdì.
La trëi biblioteches San Durich de Urtijëi, Tresl Gruber de S. Cristina y Oswald v. Wolkenstein de Sëlva se ncun­forta sun vosc unì!

Curs de ultim aiüt
A La Val en vëndres ai 11 d’otober 2024, dales 14:00 ales 18:00
Savëi ala fin coche ara vá. La fin dla vita y le morí de nüsc familiars, amisc y vijins nes fej gonot sintí perplesc, ajache le savëi secolar sön l’acompagnamënt ala mort é ti agn jü mancia. I orun dé les conescënzes de basa y dé coraje da ti sté dlungia a chi che mör. Les infermieres dl Raiun Sanitar dla Val Badia, cun na gran esperiënza te chësc setur, mët a jí n curs, olache an impara da socodí y da ti sté dlungia tla dërta manira a porsones che é tl morí. Le curs é debann y vëgn tigní por ladin. Le curs vëgn tigní a La Val tl Pice salf de Comun en vëndres ai 11.10.2024, dales 14:00 ales 18:00. Prëibel se anunzié danperfora cina ai 10.10.2024 sot al numer de telefon 0474 586155.

Tru de vita – domisdé informatif
En sabeda ai 12 de otober dales 13:00 ales 17:00 vëgnel tigní tl salf dles manifestaziuns a San Martin de Tor la manifestaziun »Tru de vita«, n domisdé informatif cun sorvisc, istituziuns y assoziaziuns che nes acompagnëia sön le tru de vita
Olá pói pa jí a damané do aiüt sce i mëssi ti fá le guern a n familiar? Y sce mi möt cocogna? Y sce i á problems tla copia? O sce al é problems de dependënza? Ci scora dessi pa iö sciöche porsona jona chirí fora? I á tres la ria löna, che pó pa me daidé? Tratan la vita sunse gonot metüs dan da n gröm de domandes che podess ciafé na resposta o na indicaziun, jon al domisdé de informaziun che vëgn tigní ai 12 de otober. En chësta ocajiun sarál sorvisc, istituziuns y assoziaziuns desvalies che se presënta, che dá informaziuns y consëis. Le obietif dess ester le contat diret, zënza messëi jí a Bornech o finamai a Balsan, te n ambiënt plajor cun degun stress. Le domisdé se desfira dales 13:00 ales 17:00 y sará tl salf dles mani­festaziuns a San Martin de Tor, cun entrada debann. Organisaziun: Comité de Raiun Val Badia.

Tecniches nöies por decoré ciandëres
Dui cursc por adulc cun Pia Pedevilla, tl atelier a Bornech
Te chisc cursc vëgnel insigné da deleghé ite tles ciandëres scrites, motifs y fotos fac cun computer. Lapró vëgnel ince insigné d’atres tecniches tradizionales. Vigni partezipant ciafa na mapa cun i motifs nüs y zitac ince por ladin.
Le pröm curs é en sabeda ai 12 de otober dales 14:00 ales 18:00, a 60,00€ plü 9,00€ a cian­­dëra; le secundo curs é en jöbia ai 17 d’otober dales 19:00 ales 22:00, a 45,00€ plü 9,00€ a ciandëra.
I cursc vëgn metüs a jí en colabo­raziun cun l’EPL y vëgn tignis tl atelier de Pia Pedevilla (Gross Gerau Promenade 6c) a Bornech. Al vëgn tut sö alplü 6 partezipanc. Info y iscriziuns pro Pia Pedevilla al 348 2221745 o info@piapedevilla.com