La Usc di Ladins

Ince te nosta valada á la ciacia oramai na gran tradiziun. Sce le jí ala ciacia ê dandaía dantadöt na chestiun de suraviënza, á i iagri aldedaincö la funziun da ciaré dl salverjin, da le regolé olache al mëss ester, y da sconé so ambiënt de vita. Na pert importanta dla ciacia te Südtirol á bele da tröc agn incá ince i corgn da ciacia – chisc stromënc che gnô adorá tl pröm dantadöt por n debojëgn, da dé segnai y indicaziuns, mo che á spo ciafé na funziun ince por ocajiuns de comié cina al aurela cörta. Melodies conesciüdes sciöche "Das große Halali" o le "Hirsch tot", che vëgn intonades canche le tier é ciacé, o le"Jagd vorbei", por i dé l’ultim salüt pro la sopoltöra de n iagher, é melodies de respet y cuaji de ritual, podesson dí. Aldedaincö él te Südtirol 27 grups de corgn da ciacia.
Ince tla Val Badia á i sonadus süa tradiziun dejenara. Sciöche an pó lí do tl liber "La ćiacia de Mareo", án tl revier de Mareo bele arjigné l’ann 1979 i pröms corgn da ciacia, sön iniziativa dl retur da inlaota Lois Ellecosta de Colac. Al gnô metü sö n grup de iagri sonadus, che á soné le pröm iade dl 1981 y che gnô porté inant cun ligrëza y impëgn dal surastant Filippo Ellecosta da Longega. Cun le tëmp án orü tó ite forzes nöies, damanan le sostëgn de iagri sonadus dai atri reviers dla Val Badia y an damanâ insciö Pio Pescoller dl Iagher da Lungiarü da surantó y insigné jö i sonadus. Al nasciô insciö le grup di sonadus "Ladinia", che se lasciâ aldí le pröm iade ai 18 d’otober dl 1984 a San Martin, en gaujiun dla noza dl iagher Tone Frontull de Mareo. Da chël de él passé rodunt incö che chësc articul vëgn fora, 40 agn – n iubilé che i iagri n’orô nia lascé passé ia ma insciö.

Deplü sön la festa, cun fostüs de storia de chësc grup, podëise lí t’La Usc di Ladins di 18 d’otober  (pablo)