La Usc di Ladins

L é un di miores bilanzes de semper chel che la Mèlga de Fascia à serà sù a la fin del 2022. N utol de ejercizie de 120 mile euro, l dopie respet al an dant che era stat de 67 mile euro e beleche 600 mile euro de più ence de faturat che passa da 2 milions e 600 mile euro a 3 milions e 200 mile euro. L conferiment é passà da 2.368.893 a 2.233.420 ajache l é jit fora n sozio ma n é vegnù ite un nef de jené de chest an, l é stat comprà più lat da 165.510 a 360.672 per ge fèr front a la vendites che é smaorèdes. L valor dat ai sozi é passà da 1.248.209 (0,527 euro al chilo) a 1.509.976 (0,676 euro al chilo) e chest l é segur l dat mior che ge dèsc sodesfazion e paa fora i sozi de sia fiduzia te sia mèlga. I dac del bilanz lec ju da la dotora Roberta Girardi de la Federazion Trentina de la Copratives di bachegn te la radunanza chiamèda ite en jebia al prum de jugn te la senta de Pera à moscià che la Mèlga la é do che la se tira su na costa, l’à lurà n muie ben e chest dèsc gaissa per jir inant e pian pian paèr ju la debites amò en esser che é de passa 2 milions de euro. I 15 sozi prejenc, sun 26, à aproà duc a una l bilanz.

La radunanza se à avert con n menut de acort per recordèr l sozio Luigi ’Gino’ Lorenz e dapò l president Luigi Deluca de Coluzi à let ju sie intervent. Dant da dut l à volù rengrazièr l Consei che l an passà ge à renovà la stima per sie terzo mandat da president: »chest desmostra che i à na gran fiduzia te me, chest me dasc amò più gaissa a jir inant – à dit Deluca.

De più su La Usc di Ladins de en vender ai 9 de jugn del 2023  (Monica Cigolla)