La Usc di Ladins

I à defilà ju per duta strèda de Meida, bie fornii de fiores e compagné dai Studafech de duta Fascia con sia mondura da festa, ensema con la Musega de Poza, la autoritèdes e i mesi storics rué da Levico. I prumes protagonisć en domenia ai 24 de setember l é stat na autobot e na autoscèla, mesi de gran valor (anter duc doi zirca 1 milion e 300 mile euro) che da vèlch meis i é rué te la caserma de protezion zivila de Vac e che apontin en domenia i à abù sie batum ofizial.

Dedant a la caserma se à binà ence n muie de jent, che à podù tor pèrt a la messa grana ciantèda bel ence per ladin dal Cor de gejia de Poza. Don Andrea à rejonà de l’emportanza de fèr servije zenza tornacont e dapò l à benedì i doi mesi, ma prum de dut l à volù ge dèr la benediscion al gran grop de operatores de protezion zivila e orden publich che era tel piaz: studafech ma ence raprejentanc de la Crousc Checena, del Socors da mont, de Polins e Carabinieres.

Dapò, do l In ladin sonà da la Musega de Poza, i intervenc di raprejentanc istituzionèi prejenté dal vizeispetor don Mario Bravin à portà dant en curt desvalives aspec e valores del event metù a jir. 

L comandant di Studafech de Poza Andrea Winterle à rejonà con emozion de l’autobot: poder la aer per sie corp l era n ensomech a chel che l ge stajea do da egn, ajache chela veia l’aea oramai 35 egn e a la fèr ruèr l era stat proprio sie père, Hanzi, comandant enlouta. 

De più su La Usc stampèda de vender ai 29 de setember.  (Lucia Gross)