La Usc di Ladins

La é stata metuda su ofizialmenter chest an de mé, la Sozietà ‘Gregn evenc’, do n lonch lurier per creèr n organism emportant bon de ge dèr n fondament staif a l’organisazion de garejèdes de livel mondièl tel schi e te autra disciplines e de se meter apede a la sociazions sportives per les didèr a livel burocratich e economich a endrezèr chi evenc che pel portèr l inom de Fascia te dut l mond.

L lurier era peà via jà dant, per ruèr enjigné ai gregn apuntamenc de Copa del Mond de chest invern, e a cef l era stat metù Andrea Weiss, cernù per sia esperienza longia e percacenta te chest setor: jà del 1994 Weiss l aea endrezà i Campionac del Mond de hockey del Grop A ta Dèlba, l é stat per 25 egn diretor de l’APT de Fascia e l à portà te val l projet ‘Piste Azzurre’, tegnan semper n contat percacent coi referenc provinzièi e nazionèi de la FISI.

Ampò ades, sun usc de n invern olache Fascia à zacan arjont l zil de vegnir metuda ofizialmenter tel calandèr de garejèdes de Copa del Mond, l é crepà fora la costion: l president Andrea Weiss no l va più ben. La rejon? La é prest dita: l se à candidà a la ultima litazions provinzièles con la lista ‘Fascegn’, e a Trent, al assessor al turism ‘in pectore’ Roberto Failoni chest no cogn ge aer fat piajer.

De più su La Usc stampèda de vender ai 3 de november.

 (Lucia Gross)