La Usc di Ladins

Se à serà su con doi spetacoi da marevea i corsc de teater per bec e joegn fascegn, metui a jir da la Sociazion Antermoa e da la regista Michela Marangoni, che da egn te Fascia la porta dant dessema a si gropes evenc de gran efet, bogn de engaissèr tant chi che l é sun paladina, che chi che va a veder.

»Pèsc« l é l titol del toch teatrèl prejentà en domenia ai 26 de mé dal grop de zirca 20 tousc e touses de la scola autes, con inserimenc ence de dotrei scolees de la mesènes. L toch che vegn ca da la tradizion greca, scrit da Aristofane tel V secol dant de Crist, l é amò anchecondì deldut atuèl: popoi en vera, nazions che bega, vic, cativeries, egoism e sacotenc etres mèi fèsc doventèr la vita su la Tera semper più senestra. 

No l é stat da de manco en cont de partezipazion l spetacol »Wonka« portà dant en sabeda 1 de jugn endò al PalaDolomites de Ciampestrin da passa 60 bec e bezes de la populères de Fascia. L toch teatrèl adatà per l'ocajion per ge dèr lerga a duc i picoi atores, con duc i personajes quintupliché, l à portà dant la contia cognosciuda »La frabica de ciocolata«, ence te chest cajo con gran coinvolgiment de la jent te sala.

De più su La Usc stampèda de en vender ai 7 de jugn. 

 (Thomas Zulian)