La Usc di Ladins

Se sera su per la sozietà de impianc de Ciampac n’autra sajon positiva. »Sion n muie contenc de coche la é jita – à dit l president Tullio Pitscheider. Enceben che l meis de jugn e l scomenz de messèl sie stat burt temp con pievia, aon segnà n +15% de azesc respet al istà del 2023 che l era jit belebon. Chest de gra ai troes tematics che tira n muie de families e al smaorament de la comunicazion. Ativitèdes e projec che valorisea la beleza del teritorie, defat i turisć rua sun Ciampac ence per più dis.« N muie aprijié l é stat i librec per i picoi per portèr a compiment la miscions sa mont, l gran percors a forma de drach realisà dal artist Franz Avancini e i maxi jeghes de n’outa, dal minigolf a man al bowling, dal ‘forza quattro’ al memory.

Gran suzes ence per l Troi Sentà de Marco Nones sun Sela Brunech con carieghes e trons originèi metui ju te posć panoramics, la banca contenta o chela per i enamoré, l tron per se fèr n pisol o per se ensomeèr, dut tedant a la bela vedudes de la Dolomites.

Oramai la sajon da d’istà la é do che la va a piz e defat chisc l é i ultimes dis per jir sun Ciampac ajache l impiant sera en domenia ai 15 de setember con na bela festa sa mont; en chel dì se pel jir su e ju a n priesc arbassà de demò 10 euro.

Dapò l impiant de Ciampac orirà endodanef ai 5 de dezember per na neva sajon da d’invern.

 (Monica Cigolla)