La Usc di Ladins

Vaia, ai 29 de otober del 2018. L é passà 6 egn giusć da chela net canche n fort vent à mudà deldut la parbuda de nesc bosć e do dal vent ence l becherle. La ponta de l'epidemia da becherle tel Trentin oramai ades se l'aon lascèda vindò la schena, ma va inant l monitorage e se seghita con la mesures de contegniment. Endèna se laora per meter a post l bosch con l embosćiament che va inant debel: la piantines metudes ju via per chest an 2024 les é states 450 mile. L risech resta amò aut te 107 di 442 catastres de la provinzia de Trent, ence se dut ensema la cantità di dans segnalèda se à smendrà da 1,5 milions de metres cubi de èlbres del 2022-2023 ai 0,6 milions de metres cubi del 2023-2024. L agiornament sun dac e strategies se l troa tel 'Pian per l endrez di intervenc contra l becherle e la recostruzion di bosć danejé' aproà a la metà de otober da la Jonta de la Provinzia de Trent su proponeta del assessor ai bosć Roberto Failoni. L becherle se à smendrà debel a confront di egn passé e chest fèsc pissèr che te vèlch an se posse jir fora da l'emergenza ma no ge vel zeder, defat, descheche se sà, i é desvalives i fatores che para do o fera sia evoluzion. Ma co éla la situazion en particolèr per chel che vèrda l bosch de Fascia? N aon rejonà col Diretor del Ofize Forestal Distretual de Ciavaleis Damiano Fedel.

Podede lejer duta l'intervista su La Usc stampèda de en jebia ai 31 de otober.  (Monica Cigolla)