La Usc di Ladins

Piergiorgio Ghetta dal Ones l é nasciù te la Ciasa de la Moniaria, olache da chest an à troà denef lèrga la Redazion de La Usc di Ladins.
En ocajion de la Festa del Rengraziament, dedichèda chest an a la storica istituzion, ge aon domanà che l ne conte mingol de si recorc, de canche l era bez chiò a Sèn Jan, te chesta Ciasa, la vita de la familia e l lurier che i fajea con so pare Agostino ‘Gusti’ Ghetta dal Ones, che l é stat l ultim monech de la Comunità de Fascia.

Piergiorgio, che ve sàl ruar ite te chesta Ciasa ades?
Piergiorgio Ghetta L é dut mudà, demò chesta pruma stua la é amò valiva, me recorde che l l’à fata ite mie pare. Dant da noi chiò l era chi de Romedi, l era el l monech e te chesta cambra i dormia ite de dotrei, ma l era sfenadure larie n deit anter i tulins. Mie pare l à chiamà Bepi Tach e i l’à fedrada. Dapò caite dormia mie sores, dute doi ensema te n let de chi del ’800, che l era del giaf de mia mare, tant aut che se cognea le uzar su a le meter te let. Enveze chiò, olache siede col giornal l era la stua coi lec de mie pare e mia mare, e gio son nasciù proprio chiò, l era na pareada de legn che la spartia da la cambra olache dormiane noi trei fredes e cavia l era la ciasa da fech.

E l forn dal pan?
Canche sion rué noi l forn dal pan daite no l era jà più, ma nience chi de Romedi crese che no i lo aesse durà. I l’aea fat su del 1830, chest l sé, ma dapò l é restà bele demò per bel de fora.

Podede lejer duta l'intervista su La Usc stampèda de en vender ai 25 de otober.  (Lucia Gross)