La Usc di Ladins

Ultima vijita menada
Le Museum Ladin Ciastel de Tor inviëia al’ultima vijita menada ofizialmënter fora por la mostra »Countdown to Mass Extinction?« cun le curadú Herwig Prinoth en domënia, ai 27 de otober
La mostra temporana pîta n cheder afascinant dla maiú estinziun de massa sozedüda tla storia dla tera y la mët en corelaziun cun la crisa climatica atuala. La vijita menada vëgn proponüda dales 15:00 ales 16:00 por todësch y dales 16:00 ales 17:00 por talian. Al vëgn perié do na prenotaziun tres e-mail a prenotaziuns@musemladin.it o tres telefon pro le nr. 0474 524020. Le cost é de € 10,00 (incl. entrada tl Museum Ciastel de Tor).

La show dl clima röia a Badia
»Heiß. Heißer. Klimashow«. Na serada por informé sön les gaujes dla crisa climatica y porté dant poscibilités por mioré la situaziun; en lönesc ai 28 d’otober a Badia
La linia de evënc »Heiß. Heißer. Klimashow« á sciöche travert de informé sura les conseguënzes dla crisa climatica y da motivé vignun de nos da fá val’ decuntra. Tla show vëgnel traté deplü aspec dla crisa climatica. Al vëgn splighé les gaujes y porté dant poscibilités por mioré la situaziun. La show dl clima röia a Baida en lönesc ai 28 d’otober dales 20:00, tla Ciasa J. B. Runcher. La serada vëgn organisada dal Consëi de Formaziun Badia.

Serades cun la mognan Teresa Zukic
La mognan conesciüda Teresa Zukic röia dai 5 ai 7 de novëmber a Corvara y San Martin de Tor, por trëi serades olache ara baiará de dlijia, dl’importanza da ti dé saú ala vita, de mësses por mituns y de co che an pó archité i pinsiers malsagns
Sön iniziativa dl grup KFS da San Martin de Tor y en colaboraziun cun i consëis de formaziun da San Martin de Tor y Corvara, vëgnel metü a jí trëi serades cun la mognan conesciüda Schwester Teresa Zukic.

Nia ma funzioné, mo ince savëi da s’la gode
Le pröm apuntamënt é en mertesc ai 5 de novëmber dales 17:00, tl salf dles manifestaziuns da Corvara, sot al titul »Wer nicht geniesst wird ungeniessbar!«, olache ara baia de sciöche la porsona proa te vigni situaziun dla vita da funzioné y porté resultac, desmentian n aspet important dla vita: savëi da s’la gode.

Le monn afascinant dles mëssses por mituns
En mercui ai 6 de novëmber dales 20:00 vára inant te palestra da San Martin, cun le referat »Abenteuerland Kindergottesdienste«, olache Schw. Teresa Zukic baiará de tan important che al é da abelí ince mësses a mosöra di mituns, por arjunje le travert plü important: entusiasmé i mëndri por Gejú.

Buna nöt ai fistidi
La jöbia ai 7 de novëmber dales 20:00 s’incunton tl salf dl Istitut Ladin Micurá de Rü, por la serada dal titul »Lebe, lache, liebe... und sag den Sorgen gute Nacht«. Te chësta sëra baia Schw. Teresa Zukic di fistidi y de tan de fistidi por nia che i nes fajun, y ara respognará ala domanda: Co podunse pa tigní sö i pinsiers malsagns y vire nosta vita cun umor y buna löna, ince sce al é dificoltés sön tru?

La referënta
Schwester Teresa Zukic é mognan y pedagoga dla religiun. Cun so talënt da baié, so umor y entusiasm por la fede él na personalité che motivëia y tira para. Ara á instëssa superé la maratia dal crebesc y é deventada por tröpes porsones na fontana de coraje y ispiraziun tla vita da vignidé. Les serades é dötes debann y zënza prenotaziun.
Dötes y düc é inviá da anuzé chëstes ocajiuns.

“Lüch Col Plat”
Tosc saral indô teater a La Ila
L’Uniun Teater La Ila é tl laur da arjigné ca le teater da ri “Lüch Col Plat”. La rejia é de Erika Castlunger, les löms de Luca Pizzinini. Sön paladina él da odëi Alessandro Bonfanti,  Marco Moscon, Andreas Peccei, Andy Pizzinini, Roland Pizzinini, Sabine Rudiferia,  Susann Tavella y Cindi Vittur. Les rapresentaziuns sará la sabeda ai 2 de novëmber dales 20:30, domënia 3 de novëmber dales 17:00,  mercui ai 6 de novëmber, vëndres ai 8 y sabeda ai 9 de novëmber dales 20:30, y la domënia ai 10 de novëmber dales 17:00 tla Ciasa de Cultura a La Ila. Les prenotaziuns por i posć vëgn tutes sö al numer telefonich 333 2525740.