La Usc di Ladins

I ‘caregiver', parola ingleisa che oramai é jita ite te nosc lengaz da vignidì, l é la persones che rencura zachei de cèsa, de spes de età, e la vel dit apontin chi che ‘porta cura'.

L é na situazion che pel pesèr trop su la vita de chi che se cruzia de ge stèr apede a n parent, soraldut se l vegn fat per n muie de ores vigni dì e per n trat de temp lonch.

Al scomenz, canche la persona de cèsa scomenza a doventèr veia, l'à de besegn de picoi didamenc te la robes da vigni dì, desche uzèr peisc, jir a proveder, vegnir compagné a fèr vijites sanitères, robes che per solit vegn fat dut un. Col temp, man a man che se smendra l livel de autonomia, l familiar che stèsc apede l cogn se tor su encèries maores, e ajache l'età mesèna de la popolazion seghita a crescer, de la fegures de ‘caregivers' sarà semper maor besegn.

L é te chest chèder che a livel provinzièl l é nasciù l projet Curaensema, che l à desche obietif de recognoscer, sostegnir e valorisèr la persones che rencura zachei de cèsa, con azions de sensibilisazion, formazion, supervijion e confront.

L projet l é peà via amò del 2019, ma ades l vegn metù a jir ence te Fascia su proponeta e endrez del Servije Sozio-assistenzièl - Spazio Argento del Comun General de Fascia, en colaborazion con la Fondazion Demarchi de Trent, ent formator de referiment de la Provinzia Autonoma de Trent.

La pruma scontrèda de prejentazion del percors de sensibilisazion sui temes de l'assistenza vegn metuda a jir en lunesc ai 5 de mé, da les 5 domesdì te senta del Comun General de Fascia. Chesta pruma scontrèda, averta a duta la popolazion, l é l'ocajion per portèr dant l percors de Curaensema, ma ence per prejentèr duc i etres servijes che se pel troèr sul teritorie per didèr la jent de età e per scutèr la testimonianza de na persona che se cruzia de rencurèr zachei de cèsa.

Se pel lejer dut su La Usc nr 16 dai 2 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (CT/LG)