La Usc di Ladins

Danny, al mancia dui mënsc ala setima ediziun dla copa dal monn dles ëres söla Ërta.
Io y nos sun belo tal arjigné ca les tribunes, por che an n’ái nia gran druch do les festes da Nadé. I sun encontonc che ara é jüda da fá nëi y che al é gnü frëit, ensciö n’ánse nia bria da se sté enré por les pistes y la daorida dla sajun. Desche ara é eniann, él belo val’ agn che ara n’ea nia plü.

Ci novités ti aspetel pa ai fans por la proscima gara?
Pla gara co sará le dedolönesc ai 30 de jená, ánse en program da fá belo la domëgna en conzert, ince por anüzé deplü la strotöra co é en pe y co costa bindebó de scioldo. Al sará da sëra na show cun laser y na fiacolada jö por la Sorega y spo en conzert con na cover band dai Dire Straits. Tal raiun VIP sarál eniann empede co la cëna ciamó en DJ co mët sö musiga, por podëi se devertí deboriada. Le de dla gara sarál spo danter la pröma y secunda manche la ciantauturia Ivana Spagna co ciantará val’ ciances conesciüdes dai agn ’80. L’idea é da la lascé cianté dan tribuna, por che an pói la odëi plü dampró. I n’orun nia tó ciantauturs da foradecá, deache al é na gara tla Talia, les talianes é gonot roades sön podest y porchël tigni ince che al sii ciantauturs taliagn. I m’la conforti.

Eniann él 11 gares de copa dal monn tla Ladinia. Tan enteressant y emportant él pa da te enfora ciamó da avëi chisc gran evënc y co pó pa chi d’Al Plan se desfaronzié, sce "düc" l’á?
An se desfaronziëia belo deache vignönn á en pü’ en n’atra disciplina y en n’atra gara. Söla "Erta" ánse le plü bel gigant dles ëres. Cösc ne diji nia iu, mo les atletes enstësses. Nosta contrada, con la odüda sön le paisc, é spo bën val’ de particolar. Tló Al Plan ánse en ambiont dër familiar, ci co gareta spo ince con la party-mile do la gara. Düc vën tuc sö con ligrëza, düc é bënodüs y te Mareo sánse bën ince da fá bel coi ghesć. Spo él sogü vëi che i atri fej pö ince en bel laur. I n’án bria da se envidié ia y ca nia y al n’é gnanca na concorënza. Al é plücoater na motivaziun da se ciaré y proé da fá miú. Eniann s’ánse ince prejenté düc deboriada a Milan, ci co é stada na beliscima iniziativa.

 (Intervista: Pablo Palfrader)