La Usc di Ladins

Ci che le paisc y la comunité da La Val ne n’á döt passé chësc ann... me pënsi sce i ciari zoruch a chësc 2024. La maiú pert é por fortüna stades ocajiuns de ligrëza, mo baldi ne n’ál gnanca mancé les desgrazies y les leghermes. Döt cant á ince ciafé lerch tles manifestaziuns che é zënzater stades sön la pert a sorëdl dla vita, chëres por la festa de iubileum por i 150 agn dla dlijia nöia. An á recordé na zesöra tla storia de paisc, canche an â tut la dezijiun da sposté la dlijia – y cun ëra döt le zënter – dal post che i conesciun incö sciöche Dlijia Vedla cina jö Plan Murin. N fat che â inlaota cherié zënzater so sotissura te paisc, mo che â dantadöt ince mostré ci che ara vá da arjunje sce an liëia les forzes. Chësc án bëgn ince odü ince sëgn, 150 agn dedô, ci che ara vá da mëte en pe sce an tëgn adöm tla comunité, deache chi da La Val á salpü da mëte en pe n program rich y spës, coordiné da n grup de laur sot la presidënza de Agostin Moling, mo metü en at feter da na comunité intiera, podesson dí. Por che al garatass él sté n gröm de uniuns che á daidé para, porsones privates, gragn y pici. Forsc é propi chësta ince stada la rezëta che á porté a n suzes tan gran de vigni vers. Na comunité che á tut pert canche ara nen jô da se trá ite les manies y daidé organisé, mo ince na comunité che á tut pert canche al é sté da ti ciaré al resultat rové, da se gode i früc dl gran laur.
En domënia ai 25 d’agost él sté la gran festa de conclujiun, cun la gran mëssa solëna zelebrada dal Vësco Ivo Muser y cun la prozesciun a onur dl patrun dla dlijia San Senese.

Deplü podëise ciafé t’La Usc di Ladins di 30 de agost, olache i ciarun ince zoruch ales manifestaziuns che ti é jüdes danfora, y al concurs che é gnü metü a jí por l’ocajiun.  (pablo)