La Usc di Ladins

La domënia ai 25 d’agost, olache an á tigní a La Val la festa de patrozine de San Senese, é ince stada la domënia olache la jënt á podü dé jö süa usc por les prelîtes, en previjiun dla lîta de Comun che sará ai 10 de novëmber. En lönesc sëra s’á le comité dles prelîtes abiné por cumpedé fora les usc y an pó dí che la jënt á tut pert cun tröp interes.
Sön les 1.095 zetoles partides fora, él sté 761 porsones che á dé jö süa usc, tan co le 69,5%. Ma cater zetoles ê blances. Sciöche i un informé, podô la jënt dé jö öna na usc por le candidat o la candidata da ombolt, y 4 usc por porsones che ara odess ion te Consëi.
Trat adöm en general, pón dí che la Junta de Comun atuala pó se bate sön les sciables, deache ara á ciafé gran crëta.

Felix Nagler pröm pro la prelîta da Ombolt
Pro la prelîta da Ombolt á ciafé le plü usc chës cater porsones che â ince detlaré da orëi se mëte a desposiziun o da avëi interes. Al pröm post ciafunse l’assessur Felix Nagler, che á abiné adöm bëgn 235 usc. Le vizeombolt atual Felix Dapoz é rové al secundo post cun 202 usc, tratan che le "newcomerin" Magdalena Miribung, möta dl ombolt da denant, á ciafé la crëta de 154 porsones. Al cuarto post ciafunse spo l’ex aconsiadú provinzial Manfred Vallazza. Scebëgn che al â detlaré che al n’ess bonamënter nia candidé, por rajuns familiares, ál impó ciafé 123 usc. La lista vá spo inant cun trëdesc d’atres porsones, che á dötes ciafé 4 o manco usc.

Gran resultat de Hansi Rubatscher y Felix Dapoz
I assessurs atuai á ince ciafé gran crëta pro la prelîta dl Consëi. Al pröm post ciafunse chiló l’assessur Hansi Rubatscher, che á abiné 215 usc. Toch iadedô le vizeombolt Felix Dapoz cun 214 usc y Magdalena Miribung cun 211 usc. L’assessur Felix Nagler á stlüt jö al cuarto post cun 194 usc, tratan che l’assessuria Rita Moling Rubatscher á abiné adöm 149 usc. Passa cënt usc ince por l’aconsiadëssa Veronica Rubatscher, che á ciafé 124 preferënzes.

I prelitá cina a 10 usc
La lista dles prelîtes vá spo inant insciö:

Matteo Pescollderung 83 usc
Vito Campei 76
Daniele Moling 66
Markus Complojer y Karl Nagler 60
Manfred Vallazza 57
Alexander Alton 52
Davide Frenes 45
Egon Alton 44
Sylvia Costabiei 42
Edith Ploner 40
Daniel Frenes 38
Franz Miribung 37
Manfred Moling 33
Gottlieb Moling 26
Valentin Miribung y Pio Ploner 21
Michael Nagler y Michael Rubatscher 19
Stefan Sottara 18
Simon Comploi, Werner Moling y Alex Ploner 17
Sepl Miribung (Rü) 15
Markus Campei 14
Franz Dapoz y Paul Pezzei 13
Albina Sottara 12
Markus Rubatscher y Davide Schuen 11
Elisabeth Insam Complojer (Mirió), Othmar Moling, Gianni Murer, Max Nagler, Federico Rubatscher, Michaela Sorarú, Ursula Thaler Dejaco y Daniel Tolpeit 10 usc  (pablo)