La Usc di Ladins

Tres indô vëgnel a s’al dé proiec interessanc, che mira da porté adöm porsones de mendranzes da piz a ciantun, por sostegní le barat interlinguistich y intercultural. Un de chisc proiec é zënzater ince la scora da d’isté inviada ia dai 9 ai 13 de setëmber a San Martin de Tor, olache reladësses y reladus de nosta université y de universités europeiches ti á porté dant a studëntes y studënc internazionai relaziuns a 360 gra, sot ala tematica generala dla "Migraziun intraromanza y plurilinguism".

L’iniziativa é gnüda organisada dales ladines Beatrice Colcuc da Col de Santa Lizia (Université de Salzburg) y Ruth Videsott da San Martin (Université de Balsan), deboriada cun David Paul Gerards dla Université de Mainz tla Germania y Gabriele Zanello dla Université de Udin. Döt cant cun le finanziamënt dl’assoziaziun de romanistica todëscia DRV – Deutscher Romanistikverband, y les universités de Balsan, Udin y Mainz. "Al é gnü baié de plurilinguism da punc d’odüda desvalis, da chël soziolinguistich a chël cognitif y ci che chësc comporta ince por les aplicaziuns didatiches suradöt por i lingac de mendranza", tira adöm Ruth Videsott le contignü. So colegh David Paul Gerards injunta: "I un metü adöm na scora cun esperc che laora sön le plurilinguism da punc d’odüda desvalis y che se crüzia de lingac desvalis. I sun contënc che ai ais azeté nosc invit da gní a baié a San Martin."

Al proiet á tut pert studëntes y studënc da piz a ciantun: dala Talia, dal’Austria, dala Germania, cina ala Spagna, ala Polonia y cinamai dal Brasil. Por ëi instësc na ocajiun de barat importanta y particolara, cun les "leziuns" tignides tl’atmosfera storica dla stüa dl Museum Ladin Ciastel de Tor. "Na stüa sciöche cör dla ciasa, n post olache an á ciafé n ambiënt n pü’ plü intim y creatif", dij inant Videsott.

Deplü sön chësta edema de scora particolara, podëise lí t’La Usc di Ladins di 27 de setëmber  (pablo)