La Usc di Ladins

Tl comun de Badia él ti ultims tëmps gnü organisé feter danü la desgorta dal refodam. Do la daurida dl zënter de reziclaje Sompunt a Badia da d’altonn dl 2023, él cun i pröms de dezëmber gnü tut demez i trëi gragn zëntri de racoiüda ti paisc, cun les ciampanes lapró; chësc ince deache al gnô lascé jö de vigni sort. Resté êl ma plü n valgönes baraches, olache an pó lascé jö cina ciamó i sac vërc cun logo dl Comun por le refodam de ciasa, sciöche ince le refodam bio. 
Dificoltés án rodunt ince cun le refodam bio o refodam organich, sciöche l’assessur Christian Pedevilla spliga: "I messun ciaré da ciafé na soluziun por le refodam organich, che n’é al momënt nia net assá. Al vëgn sciuré ite dër tröpa plastica y nia dainré ince ciomënt de ciasa." Le bio dl’Alta Badia, olache al é cis de sajun de grandiscimes cuantités, messará gní condüt tl implant aposta a Lana, olache al mëss indere ester nët. Pedevilla dij inant: "Le su sistem por arjunje chësc, é che vignun ais so contegnidú da 120 litri che al mët spo fora pormez a strada olache al vëgn coiü adöm plü iadi al’edema, o che vignun vá cun so pice contegnidú tl zënter de zeziclaje".

Co che la situaziun se müda tl concret, podëise lí t’La Usc di Ladins di 27 de setëmber  (pablo)