Tl’atualité dla crisa climatica, che se lascia sintí – can deplü can demanco – n pü’ sura döt le monn, crësc tres deplü la sensibilité por la sconanza ambientala, por la sostenibilité, por n stil de vita che scona deplü nostes ressorses. N "trend" che á oramai tut ite deplëgn ince le ciamp turistich, olache ince les localités de nosta valada s’á dé da fá por arjunje zertificaziuns aladô, sciöche la zertificaziun GSTC, che ciara ala sostenibilité ambientala, culturala, economica y ince soziala.
Dlungia les localités, él ince sté strotöres turistiches che á fat para le prozes de zertificaziun, che stá por na manira de lauré plü sostenibla. Cun la sostenibilité turistica se dá jö spo le proiet europeich
"ETSM2030" (European Tourism Sustainability Monitoring 2030), sostegní da deplü istituziuns scientifiches y d’atres organisaziuns, danter chëstes la Université da Desproch, le Terra Institute da Porsenú y Eurac Research da Balsan. N proiet che se tol dant da cherié na rëi danter strotöres sostenibles, promöie l’aspet dla sostenibilité y ti dé vita a proiec nüs te chësc ciamp. Porchël él bele l’ann passé gnü scrit fora la bandida de partezipaziun, olache al é sté indöt 144 domandes da strotöres turistiches da Austria, Germania, Talia, Polonia, Romania y Slovenia. Ala fin n’él gnü tut sö indöt 84 y pro chëres dla Talia él ince döes strotöres zertificades d’Al Plan: le Hotel Excelsior, rapresenté dala fia Giulia Call y le B&B Les Gomines cun süa patrona Barbara Frenner. Na pröma pert importanta de chësc proiet, che döra indöt dui agn, ê chëra dla formaziun, olache ares á tut pert a na linia de cursc che se tol dant da svilupé "le förtl y les metodes por apliché la sostenibilité".
Sëgn éson rová tla fasa che i partezipanc á instësc da mëte en pe n proiet concret. Giulia Call y Barbara Frenner s’á insciö metü adöm por ti dé vita a n proiet olache ara nen vá en general de "Zero Waste", tan co zero refodam, olache ares mët l’azënt sön smendrí le spaterlamënt alimentar. So travert: adoré sö la spëisa ciamó buna, denanche ara mësses gní sciurada.
De ci che ara nen vá plü avisa, nes cunteres t’La Usc di Ladins di 27 de setëmber (pablo)
