La Usc di Ladins

En jöbia, ai 19 de setëmber domisdé se á abiné a La Val le raiun dl KVW dla Val Badia. Inviá ê i mëmbri di consëis de vigni paisc. N bel numer de passa 20 porsones é rovades adom tl salf dles manifestaziuns, mo nia düc i paisc n’ê rapresentá.
Do le salüt da pert dla surastanta Albina Sottara, á siur degan Iaco Willeit porté dant n pinsier religius che á dé da ponsé: mostran les tles d’auto ál dit che an les adora por daurí, mo an pó ince stlü fora impara. Aldedanicö él prigo che al vëgnes stlüt fora massa Chëlbeldî tla vita da vigni de. Ince tl’ativité dl KVW é Dî important, por che düc pois vire bun – le tema dl ann. Trëi virtus é importantes: la fede, la speranza y l’amur. Aldedaincö é datrai ince la speranza al prigo, an s’la vëiga. L’amur ti dá saú ala vita, al paia la mëia da la vire. Monika Gatterer, surastanta dl raiun de Puster, á spo presenté le tema dl ann: "Na buna cualité de vita por dötes y düc". 

Deplü sön la sentada dl KVW podëise lí t’La Usc di Ladins di 11 d’otober