La Usc di Ladins

"Ci é pa pordërt n quiz da ostaria?" é la domanda che i á aldí plü gonot, canche le Consëi de formaziun d’Al Plan â metü fora l’invit da tó pert. Da la dí scëmpla, nen vára bel de ci che l’inom dij, de n quiz te na ostaria. Ci che é tla Val Badia valch daldöt de nü, á sües raisc tl’Inghiltera, olache ai é nasciüs sciöche "Pub quiz". Tla sostanza él deplü scuadres che s’incunta te na ostaria, olache n moderadú fej na dërta cumpëda de domandes y vigni scuadra mëss ciafé fora la resposta. Ala fin vëgnel cumpedé adöm i punc y chi che n’á deplü davagna. Döt sozed te n’atmosfera löcra, cun le fin da passé n domisdé en compagnia, s’la ciacolé y imparé lapró val’ de nü.
Insciö ésera ince stada la domënia ai 24 de novëmber domisdé a Al Plan, olache le Consëi de formaziun á invié ala pröma ediziun. Che al sides por interes o forsc ince por coriosité, é l’invit gnü tut sö dër bun; ala fin á le presidënt Gustl Kaneider podü saludé bëgn 13 scuadres da trëi cina cinch porsones l’öna. Y do che le moderadú, o le "quiz–master" Diego Clara â splighé les regoles, ésera piada ia.

Deplü sön le quiz y sön che che á davagné, podëise lí t’La Usc di Ladins di 6 de dezëmber  (pablo)