La Usc di Ladins

L’Ombolt ê inlaota na autorité dl paisc che an ti portâ gran respet, aldedaincö mësson dí che al é chechessî che ti la taca. Ci ves motivëia pa incö ciamó da ester ombolt, ponsan che an é tres sot ala critica o sot ai refleturs?
An mëss bëgn dí che ti ultims agn él tres manco jënt che ó se candidé por la politica. Chësc vëigon ince pro chëstes lîtes, no ma te nosc comun mo ince te d’atri. Laota n’êl nia döta chësta burocrazia y an â plü autonomia da gestí les cosses. Sëgn él dër da mëte averda; i politics á manco da dí y tröp é tles mans di aministradus ti ofizi. Dl ater vers él ince la jënt che vega deplü, por vigni cossa che ne vá nia; critichëia y se lascia sö. Mo impó: fá l’ombolt me sá bel, al me sá bel da lauré cun la jënt y por la jënt.

Ciafé candidates y candidac n’é nia tan saurí. I feji n’afermaziun plü provocanta: ester te Consëi de Comun é pö na frustraziun, deache i aconsiadus n’á tan co nia da dí.
Sigü. Inlaôta â le Consëi cotan plü da dí y al ê plü dezijiuns che messâ jí te Consëi. Incö él gonot la Junta che tol les dezijiuns. Tl Comun da San Martin ái orü mëte sö plü comisciuns, propi ince por trá ite deplü i aconsiadus. I á ince porté dant chësta tematica a Balsan. Sce jënt se mët sön lista, óra pö fá val’ por la comunité. I vëighi ince te nosc comun che i aconsiadus se dá dër da fá. I odess porchël dërt che i aconsiadus ciafass ince val’ deplü, che ai ciafass ince de chël vers na picia reconescënza. I assessurs y l’ombolt ciafa val’ por so laur, ince sce i mëssi dí che ti pici comuns ne corespogn le compëns nia aladô dla responsabilité che an á y dl laur che an fej.

Cun l’ombolt unse baié dl fat che n terzo di candidac sön lista mëss ester ëres, dles desfides di ultims agn d’aministraziun y de proiec por le dagní. Al respogn spo a n valgönes critiches incër l’azes ales scores da San Martin y les plazes por i mëndri. La intervista podëise lí t’La Usc di Ladins di 14 de forá