La Usc di Ladins

La jënt dl comun de Badia se recordará la situaziun che an â albü pro les lîtes comunales dl 2020. Iló s’â presenté cater listes y bëgn trëi candidac a ombolt. La campagna litala é stada bindebó sterscia, movimentada y ince dër agressiva. Forsc é ince chësta na rajun che ara ciara fora en chësc iade döt atramënter. L’ombolt da sëgn Iaco Frenademetz ne candidëia nia plü y por les lîtes di 4 de ma se presentëia ma plü döes listes sores. La lista "Badia – La Ila – San Ciascian" cun indöt 20 candidates y candidac, cun l’avocat Christian Pedevilla sciöche su candidat a ombolt. La secunda é la lista "Deburiada", che ti pîta ai litadus 13 candidates y candidac por le Consëi, zënza n candidat a ombolt. 

T’La Usc di Ladins di 4 d’aurí ciafëise na intervista cun le candidat a ombolt Christian Pedevilla, y na intervista cun le capolista de "Deburiada" Werner Pescosta. A intrami ti unse damané ciodí che ai mina che al sides tan püch interes, ci che ai nen dij di prisc dl abité, ci priorités che ai ó mëte al zënter de süa politica y cotan d’ater. Lapró ciafëise sambëgn düc i inoms dles porsones che candidëia.    (pablo)