La Usc di Ladins

Durnwalder premet a sia domanda istituzionala les desposizions de lege che regoleia l’emiscion dles chertes d’identité eletroniches nueves tla Talia, anter l auter ence l articul 32, coma 3, dl decret dl President dla Republica 15 de messel 1988, nr. 574, che trata "Normes de atuazion dl Statut spezial per la region Trentin-Südtirol tla materia dla adoranza dl lingaz todesch y dl lingaz ladin ti raporc con la aministrazion publica y ti prozedimenc giudiziai", che veid dantfora che: "Les chertes d’identité é stampedes ti lingac talian, todesch y ladin, ti raions comunai de: Urtijei, S.Cristina, Selva, Corvara, Badia, La Val, San Martin de Tor y Mareo, sciche ence tles frazions ladines de Ciastel Sureghes, Runcadic y Bula".

Durnwalder dij che enchin al di da encuei n’él nia vegnú dé atuazion a la lege, ajache les dotazions software fornides da IPZS per i Comuns ne contegn nia l ladin.

Durnwalder se damana donca "de savei les gaujes per cheles che al n’é nia vegnú tegnú cont tla emiscion dles chertes d’identité eletroniches nueves dles spezifizités linguistiches prejentes tla Region Trentin-Südtirol sciche prevedú dal decret dl President dla Republica 15 de messel 1988, nr. 574, y sce l Minister dl Intern n’é nia "per" se operé de chest vers.  (Iaco Rigo)