La Usc di Ladins

Da anché pea via i calandères de Avent sui social de la Union Ladines de la Val Badia, de Fascia e de Gherdëina. Na scomenzadiva fora de anter endrezèda via jà da vèlch an en ca de gra a na pissèda de la sociazion badiota che dapodò l’à tout ite ence l’autra doi realtà ladines.

Ogne dì, dal prum enscin ai 24 de dezember, vea de Nadèl, sui canai Facebook e Insta­gram de la trei Unions vegnarà metù a la leta 24 bie pesć leterères, e no demò, che ge vegnarà dapò doné a 24 fortuné trac fora a la brusca anter chi che tol pèrt ai jeghes.

Duta la perso­nes che volarà tor pèrt a la estrazions les cognarà ge jir do a la piates social, meter like al post e dapodò nominèr n’autra persona ti comenc.

L projet à desche zil la promozion del materièl per ladin che ti egn l é stat enjignà. Dassen de valuta l é l leam interladin che se renforza de gra a pissèdes scempies ma ampò emportantes.

Chest an, na bela neva vegn da l’Union di Ladins de Fascia che endreza l podcast ‘Cianton del Avent’ che dì per dì compagnarà la jent tant su Studio Record (7:45, 13:45 e 20:15) che ence su la piataforma de condivijion Spotify (open.spotify.com/show/5KDYy7tjFTw72uhTyjFIoj).

Chesta trasmiscion, rencurèda da Nicoletta Riz e portèda dant col sostegn del Comun general de Fascia, la ve compagnarà enscin da Nadèl con curiosità, musega, poejies e recorc.

Donca, che spetède pa? Tolé pèrt ence vo ai calandères ladins de l’Avent sui social e jì a descorir la trasmiscion ‘Cianton del Avent’!