La Usc di Ladins

L é stat n cors de formazion dalbon enteressant, chel che l Orden di giornalisć del Trentin Sudtirol à endrezà acà presciapech n meis, avisa ai 2 de mèrz te Zenter Pastoral de Busan.

Paul Renner, professor de teologia Fondamentala e Scienza de la Religions a Persenon, à portà dant na lezion dal titol: »Islam e islamism. Anter storia, fe e fake-news«, col obietif de didèr i operatores de l’informazion a entener miec na realtà che se creit de cognoscer, ma che de spes vegn strantenuda o vegn fat confujion.

Don Renner à rejonà de la reijes del Islam, de si prezec, de che che lea e che che desferenzia la trei religions abramitiches: chela ebraica, chela cristiana e chela mussulmana, per ejempie i ric de passaje col jajun, la Careisema e la Pèsca di cristiegn, l Ramadan islamich e la Pesach ebraica. L à dit che Gejù vegn nominà 25 outes tel Corano e l à deschiarì coche sia fegura é veduda dai mussulmegn e dai cristiegn, e che che i devoc de l’una e de l’autra religion se speta do la mort.

Al scomenz de chest cors de formazion Elisabeth Anna (Lissi) Mair, te sie ruol de presidenta del Orden di giornalisć del Trentin Sudtirol, à portà sie salut a duc trei i gropes linguistics, conferman sia atenzion ence per i ladins, e l’à sotrissà l’emportanza de n argoment desche chel portà dant da Renner recordan che la popolazion de noscia tera la é semper stata averta e che anchecondì l é de besegn de jir a la reijes per entener chi che sion e olache jon, ajache sion do a se serèr semper de più.

De più su La Usc stampèda de vender ai 7 de oril.


 (Lucia Gross)