La Usc di Ladins

Bele da milens incá mangia les porsones chefri, romuns, saioc y d'atri insec, y atualmënter él incër dui miliarg de porsones che nen mangia. Da n punt de odüda iuridich vëgn i insec porimpó conscidrá tl'Uniun Europeica sciöche alimënc nüs ("Novel Food") y se damana porchël na prozedöra de autorisaziun cun la valutaziun dl risch lapró, denanco podëi gní adorá sciöche alimënc o ingrediënc alimentars.
Le pröm inset che é gnü lascé pro por gní adoré sciöche alimënt dala Comisciun europeica é sté le romun dala farina ghel (tenebrio molitor): bele da jügn dl 2021 incá pól gní tut ca intier, dlacé, secé o mené jö y gní mangé o ince adoré sciöche ingrediënt. De dezëmber dl 2021 él ciamó gnü lapró le saioch migratore (locusta migratoria) y de forá dl 2022 le grile de ciasa (acheta domesticus); da jená dl 2023 incá vel chësta aprovaziun ince por la farina de grili en pert desgrassada. Chësta pó sëgn gní tuta da fá patüc da mangé sciöche pan, cracker, grissini, biscoti, ridli, pasta, pizza, patatines o ince por produc che sostituësc la cern. Le cuarto y cina sëgn ultimo inset che dala fin de jená dl 2023 pó gní adoré te patüc da mangé é la larva dl alphitobius diaperinus, le chefer dla bla conesciü ince sciöche buffalo worm; al pó gní tut te na forma dlaciada, cremosa, seciada y ince sciöche polver.
Sce al é te n produt insec o farina de insec mëssel sambëgn gní dé dant te na manira tlera sön la lista di ingrediënc. Implü vëgnel ince scrit dant l'indicaziun di alergens por düc i insec aprová. Dantadöt les porsones che é alergiches a tiers dala crosta, moluscs y a milbes dal stöp pó avëi reaziuns alergiches ince a insec.